بنگلورو،4؍مارچ(ایس او  نیوز)مرکزی اور ریاستی حکومت کی عوام دشمن پالیسیوں کے خلاف اپنی تحریک میں مزید شدت پیدا کرتے ہوئے چہارشنبہ کے روز کرناٹک میں کانگریس پارٹی نے اپنی ریاست گیر جنا دھونی تحریک کا آغاز کیا-

کے پی سی سی صدر ڈی کے شیو کمار اور سابق وزیر اعلیٰ سدارامیا نے کانگریس کے دیگر سرکردہ رہنماؤں جن میں راجیہ سبھا کے اپوزیشن لیڈر ملیکارجن کھرگے، سابق مرکزی وزراء ڈاکٹر کے رحمن خان، منی اپا اور دیگر نے اس تحریک میں حصہ لیا اور مرکزی و ریاستی حکومت کی غلط پالیسیوں کے سبب عوام کو جو نقصان ہو رہا ہے اس کی سخت الفاظ میں نکتہ چینی کی اوران قائدین نے مانگ کی کہ فوری طور پر روز مرہ کے استعمال کی چیزوں کی قیمت میں جو بے تحاشہ اضافہ ہو رہا ہے اسے روکنے کیلئے ضروری قدم اٹھائے جائیں -

بنگلور کے کوئنس روڈ پر واقع کے پی سی سی دفتر سے شروع ہونے والی یہ جنا دھونی یاترا نے مضافات بنگلور- دیون ہلی کا رخ کیا- ان تمام قائدین نے بھی دیون ہلی کا رخ کر کے وہاں بھی پارٹی کے پیغام کو عوام کے سامنے پہنچایا اور مہنگائی کور وکنے میں مرکزی اور ریاستی حکومتوں کی ناکامی کی سخت مذمت کی- خاص طور پر ان قائدین نے پیٹرول، ڈیزل، پکوان گیس اور دیگراشیائے ضروریہ کی قیمتوں میں بے تحاشہ اضافہ کیلئے مرکزی حکومت کو نشانہ بناتے ہوئے کہا کہ اس کی طرف سے عام آدمی پر جو بوجھ لادا جا رہا ہے وہ اب اس کی برداشت سے باہر ہو تا جا رہا ہے-

اس احتجاج میں ہزارو ں کی تعداد میں کانگریس کارکنوں نے حصہ لیا- اس ریالی میں کے پی سی سی کے کاگرزار صدور سلیم احمد، رام لنگا ریڈی، ایشور کھنڈرے، دھروا نارائنا، کے پی سی سی کے شعبہ ریسرچ کے صدر منصور علی خان اور دیگر نے شرکت کی-