کانگریس کا الیکٹورل بانڈ پر سوال، مودی اور شاہ سے جواب طلب
نئی دہلی، 18/ مارچ (ایس او نیوز /ایجنسی) کانگریس نے اتوار کے روز الیکٹورل بانڈ کے معاملے پر وزیر اعظم نریندر مودی اور وزیر داخلہ امیت شاہ سے جواب دینے کا مطالبہ کیا اور حیرت کا اظہار کرتے ہوئے کہا کہ ایک کمپنی جس کا منافع صرف 20 کروڑ روپے ہے وہ 400 کروڑ روپے مالیت کے انتخابی بانڈ کس طرح خرید سکتی ہے؟
یہاں اے آئی سی سی ہیڈکوارٹر میں پریس کانفرنس سے خطاب کرتے ہوئے پارٹی کے جنرل سکریٹری جے رام رمیش نے کہا، ’’یہ رقم کہاں سے آئی اور یہ کس کا پیسہ ہے؟ وزیر داخلہ کو انتخابی بانڈ پر جواب دینا ہوگا۔" انہوں نے الزام لگایا کہ انتخابی بانڈ ’واضح طور پر منی لانڈرنگ کے لئے ایک راستہ‘ ہے۔
مسٹر رمیش نے کہا کہ کمپنیوں نے انتخابی بانڈز کے ذریعہ بی جے پی کو کروڑوں روپے دیئے ، مطلب عطیہ دو اور کاروبار لو ۔ بھتہ خوری ، رشوت دو ، معاہدہ لیں اور شیل کمپنی بنائیں اور عطیہ کریں۔
کانگریس کے لیڈر نے بی جے پی کی زیرقیادت حکومت پر الزام عائد کیا کہ کانگریس کے بینک اکاؤنٹس کو منجمد کر کے اور 'ٹیکس دہشت گردی' کے ذریعہ اس کو 'معاشی طور پر معذور' بنا کر پارٹی پر 'سرجیکل اسٹرائک' کر رہی ہے۔
انہوں نے کہا، ’’ہم ٹریبونل گئے تھے لیکن انہیں کوئی راحت نہیں ملی۔ ہم ہائی کورٹ گئے اور وہاں بھی ہمیں کوئی راحت نہیں ملی۔ اب ہم سپریم کورٹ سے رجوع کریں گے۔‘‘ انہوں نے لوک سبھا انتخابات کی مدت پر بھی سوال اٹھاتے ہوئے کہا کہ سات مراحل کا مطلب ہے کہ وزیر اعظم کو انتخابی مہم کے لئے زیادہ وقت ملے۔
کانگریس کے لیڈر نے الیکشن کمیشن پر کہا ، "الیکشن کمیشن ایک آئینی ادارہ ہے جس کا کام آزادانہ اور غیر جانبدارانہ انتخابات کرانا ہے۔ لیکن پچھلے 10 مہینوں سے انڈیا الائنس کے لیڈر وی وی پی اے ٹی کے معاملہ پر ای سی کے ساتھ ملاقات کے خواہاں ہیں لیکن ہمیں وقت نہیں دیا گیا ہے۔
انہوں نے کہا ، "ہم ای وی ایم کے خلاف نہیں ہیں بلکہ الیکٹرانک ووٹنگ 'ہیرا پھیری' کے خلاف ہیں۔ ہم صرف چاہتے ہیں کہ وی وی پی اے ٹی کو 100 فیصد ملایا جائے۔
دہلی کے وزیر اعلی اروند کیجریوال کو تازہ سمن جاری کرنے کے بارے میں ایک سوال کے بارے میں، کانگریس کے لیڈر نے کہا "پچھلے چار سے پانچ برسوں سے ای ڈی کا غلط استعمال کیا گیا ہے۔ اپوزیشن پارٹیوں کو قربانی کا بکرا بنایا گیا ہے۔ حکومت کی طرف سے ای ڈی، سی بی آئی اور اس کا استعمال کیا جا رہا ہے جب وہ حزب اختلاف کی طرف سے دھمکیاں دیکھتے ہیں تو یہ ایجنسیاں بی جے پی کی فرنٹ لائن آرگنائزیشن بن جاتی ہیں۔‘‘
جے رام رمیش نے یہ بھی بتایا کہ منگل کے روز پارٹی میں منشور ورکنگ کمیٹی کا اجلاس ہوگا اور منشور جاری کیا جائے گا۔ انہوں نے مزید کہا کہ پارٹی کے صدر ملک ارجن کھڑگے کی طرف سے دی گئی ضمانتیں پارٹی منشور میں شامل ہیں۔
