رکن اسمبلی ناگیندرا پولیس تحویل میں
نگلورو،29/اپریل(ایس او نیوز) غیر قانونی کانکنی معاملے میں بار بار عدالت سے غیر حاضر ہونے والے بلاری رورل کے رکن اسمبلی بی ناگیندرا کو آج عدالت نے پولیس تحویل میں لینے کی ہدایت دی۔ آج سماعت کے دوران جب رکن اسمبلی شخصی طور پر منتخب نمائندوں کی خصوصی عدالت میں حاضر ہوئے تو فاضل جج نے انہیں بار بار غیر حاضر ی پر آڑے ہاتھوں لیتے ہوئے پولیس کو ہدایت دی کہ انہیں فوراً تحویل میں لے لیا جائے۔ گزشتہ مرتبہ ہوئی سماعتوں سے بھی وہ غیر حاضر رہے۔ جس پر ان کے خلاف غیر ضمانتی وارنٹ بھی جاری کیاگیا تھا۔ جس کی بنیاد پر انہوں نے آج عدالت میں حاضری دی تو انہیں پولیس کو اپنی تحویل میں لینے کا حکم دیا گیا۔ منتخب نمائندوں کی خصوصی عدالت کے جج نے ناگیندرا سے مخاطب ہوکر کہاکہ کیا آپ یہ سمجھ رہے ہیں کہ تمام مقدموں سے آپ کو بری کردیا گیا ہے تو آپ کا سوچنا غلط ہے، آپ کو مقدموں کی سماعت کا سامنا کرنا پڑے گا۔