بنگلورو،11؍اپریل(ایس او نیوز) سابق وزیراعلیٰ اور ریاستی بی جے پی صدر یڈیورپا نے کہا ہے کہ ریاست میں جب سے کانگریس جے ڈی ایس مخلوط حکومت بنی ہے ریاست کی ترقی مفلوج ہوگئی ہے۔ اخباری نمائندوں سے بات چیت کرتے ہوئے انہوں نے کہاکہ وزیر اعلیٰ ایچ ڈی کمارسوامی کو صرف اپنے خاندان کی سیاسی ترقی کی فکر ہے تو کانگریس ہمیشہ اپنے برگشتہ عناصر کو منانے میں لگی ہوئی ہے۔ ریاستی عوام کی ترقی سے ان دونوں پارٹیوں کو کچھ بھی لینا دینا نہیں ہے۔انہوں نے کہاکہ کمارسوامی نے دعویٰ کیاتھاکہ اقتدار سنبھالنے کے 24 گھنٹوں کے اندر کسانوں کے قرضے معاف کردئے جائیں گے، لیکن دس ماہ بیت جانے کے باوجود بھی کسانوں کے قرضے معاف نہیں کئے گئے ۔ ساتھ ہی اس حکومت کے ذریعے کسانوں کو کچھ بھی فائدہ نہیں پہنچا۔منڈیا پارلیمانی حلقے میں بی جے پی حمایت یافتہ امیدوار سما لتا کی جیت کا یقین ظاہر کرتے ہوئے یڈیورپانے کہاکہ وزیراعلیٰ کمار سوامی کو منڈیا کے عوام ان انتخابات میں ضرور سبق سکھائیں گے۔ یڈیورپانے اس بات توقع ظاہر کی کہ گزشتہ لوک سبھا انتخابات کے مقابل اس بار ریاست کے ووٹنگ کے اوسط میں دس تا پندرہ فیصد اضافہ ہوگا۔ اور اس کا راست فائدہ بی جے پی اٹھائے گی، اسی بنیاد پر بی جے پی کو یقین ہے کہ ریاست کی 22 سے 24 لوک سبھا سیٹوں پر اس کے امیدوار کامیابی حاصل کریں گے۔ ریاست میں مختلف مقامات پر انکم ٹیکس کے چھاپوں کے متعلق ان الزامات کو کہ ان چھاپوں کے پیچھے بی جے پی کار فرما ہے، بے بنیاد قرار دیتے ہوئے یڈیورپانے کہاکہ محکمۂ انکم ٹیکس کے پاس اس کا اپنا ایک خفیہ نیٹ ورک ہے اسی نیٹ ورک کی بنیاد پر جو بھی مہیا کرائی گئی ہیں اس پر کارروائی کی گئی ہے۔ انہوں نے کہاکہ وزیر اعلیٰ ایچ ڈی کمارسوامی ،سابق وزیر اعلیٰ سدرامیا اور دیگر کانگریس اور جے ڈی ایس لیڈروں کی طرف سے انکم ٹیکس کے چھاپوں کے خلاف جو احتجاجی مظاہرہ کیاگیا وہ درست نہیں ہے، بلکہ اپنے احتجاج کے ذریعے ان دونوں پارٹیوں نے سیاسی فائدہ حاصل کرنے کی کوشش کی ہے۔ سرکاری ایجنسیوں کو کام کرنے سے اس طرح روکا نہیں جانا چاہئے۔