ٹمکورو،26؍ فروری(ایس او  نیوز)سماج میں دبے کچلے اور مظلوم افراد کو انصاف فراہمی کیلئے جدوجہد کررہے فلم اداکار چیتن کے ساتھ دہشت گردوں جیسا سلوک کرنا ناقابل برداشت ہے۔ کنڑا فلم اداکار چیتن کی گرفتاری پر مذمتی بیان جاری کرتے ہوئے دلت تنظیموں کی جانب سے ڈپٹی کمشنر دفتر کے سامنے احتجاج کیا گیا۔

اس موقع پر خطاب کرتے ہوئے دلت لیڈر ناگراج نے کہا کہ چیتن کو اغوا کرکے لے جایا گیا، ان کاموبائل فون سوئچ آف کرکے پولیس گری کا مظاہرہ کرنا قابل مذمت ہے۔پولیس دستور کے بنیادی حقوق کو دفن کرنے کی کوشش کررہی ہے۔ کم سے کم گرفتاری سے پہلے ان کے گھر والوں کو اطلاع دی جانی چاہئے۔ اغواء کرنے کی ضرورت کیوں پیش آئی؟ چیتن ہمیشہ تشدد کی مذمت کرتے ہوئے دلت اور پسماندہ طبقات کیلئے انصاف فراہم کرنے کی جدوجہد میں سرگرم رہتے تھے۔ پولیس کی جانب سے گرفتاری کا وارنٹ جاری کئے بغیر حراست میں لینے کی کارروائی کرنا قابلِ مذمت ہے۔ اگر چیتن کو رہا نہیں کیا گیا توبنگلور بند کرکے بہت بڑا احتجاج کیا جائے گااور ودھان سودھا اور ہائی کورٹ کو گھیرا جائے گا۔

اس موقع پر ڈپٹی کمشنر کے چند بسپا نے احتجاجیوں کی درخواست حاصل کرکے فوری کارروائی کرنے کا تیقن دیا۔ وہاں احتجاج میں رام مورتی،ضلع مادیگا ڈڈورکے صدر آٹو شیوراج،رنگا سوامی، کرشنپا، سریش، ناگراج، ہنومیا،سوراج ویگر شامل رہے۔