بینگلورو: الیکٹرک موٹر گاڑیوں کے لئے نیشنل اور اسٹیٹ ہائی ویز پر لگیں گے چارجنگ اسٹیشنس
بینگلورو،12؍ جون (ایس او نیوز) وزیر توانائی سنیل کمار کے بیان کے مطابق ریاست میں الیکٹرک موٹر گاڑیوں کی بڑھتی ہوئی تعداد کو دیکھتے ہوئے اب ریاستی ہائی ویز پر چارجنگ اسٹیشنس کا انتظام کیا جائے گا۔
بیسکام کے مرکزی دفتر میں الیکٹرک گاڑیوں سے متعلق حفاظتی احتیاط کے تعلق سے پورٹل کا اور بینگلورو شہر کو جدید الیکٹرگ گاڑیوں کے علاقہ میں تبدیل کرنے والی رپورٹس جاری کرتے ہوئے انہوں نے کہا کہ الیکٹرک گاڑیوں کے استعمال کی ترغیب دینے کے مقصد سے زیادہ سے زیادہ چارجنگ اسٹیشنس قائم کیے جانے چاہیں ۔ اس سلسلے میں محکمہ توانائی کی طرف سے 24 جون سے 30 جون تک ایک ہزار سے زائد چارجنگ اسٹیشنس قائم کیے جائیں گے جس میں 3 ہزار الیکٹرک پلگس فراہم کیے جائیں گے ۔ اس سلسلے میں محکمہ توانائی ریاست اور ریاستی ہائی ویز پر چارجنگ اسٹیشنس قائم کرنے کے لئے محکمہ پی ڈبلیو ڈی کے افسران سے بات چیت کر رہا ہے۔
چارجنگ اسٹیشنس قائم کرنے کے پہلے مرحلے میں تمام ضلع مراکز میں چارجنگ اسٹیشنس قائم ہونگے ۔ دوسرے مرحلہ میں سیاحتی مراکز میں اور تیسرے مرحلے میں نیشنل اور اسٹیٹس ہائی ویز پر چارجنگ اسٹیشنس قائم کیے جائیں گے ۔ 30 جولائی کے اندر ریاست بھر میں 3200 سے زائد چارجنگ پلگس لگاتے ہوئے پورے ملک میں چارجنگ اسٹیشنس کی سب سے زیادہ تعداد رکھنے والی ریاستوں میں کرناٹک کو سر فہرست لانے کی تیاری کی جا رہی ہے۔
اس موقع پر بیسکام کے منیجنگ ڈائریکٹر پی راجیندرا چولن نے بتایا کہ فی الوقت بینگلورو میں 136 چارجنگ اسٹیشنس ہیں ۔ ایک مہینے کے اندر مزید 200 نئے اسٹیشنس قائم کیے جائیں گے۔