ودھان سودھا سے چمبل کے ڈاکوؤں کو ماربھگایا جائے: کمارسوامی
بنگلورو ، 10؍اکتوبر(ایس او نیوز) سابق ریاستی وزیراعلیٰ ایچ ڈی کمارسوامی نے کہاکہ ودھان سودھا سے چمبل کے ڈاکوؤں کو ماربھگانا ہے - جنتادل (ایس) کے جنتامترا پروگرام کے اختتامی اجلاس سے خطاب کرتے ہوئے کمارسوامی نے اس خیال کا اظہارکیا اورکہاکہ ریاستی عوام کے ٹیکس کا رقم لوٹ کر بدعنوانیاں کرتے ہوئے دستاویزات کو نذر آتش کرنے والی حکومت کو بے دخل کرنا ضروری ہے -
انہوں نے کہاکہ سیاسی فائدہ کے لئے مختلف ذاتوں کے درمیان نفرت پھیلائی جارہی ہے، گجرات بندرگاہ کے ذریعہ منشیات سربراہ کئے جارہے ہیں - ساحلی اضلاع کے نوجوانوں کو گمراہ کیا جارہا ہے - انہوں نے کہاکہ بنگلور شہر کی بدنامی کیلئے کانگریس اوربی جے پی ذمہ دار ہیں، کارپوریشن میں بھی کروڑوں کا گھپلہ ہوا ہے - انہوں نے کہاکہ وزیراعظم کے طورپر دیوے گوڈا نے بے شمار خدمات انجام دی ہیں، جنتادل (ایس) کے دور حکومت میں بھی عوام نواز پروگرام انجام دئے گئے ہیں اس لئے عوام آگے والے انتخابات میں جنتادل (ایس) کو برسراقتدار لائیں -
نیشنل کالج میدان میں منعقد اختتامی پروگرام سے خطاب کرتے ہوئے جنتادل (ایس) بنگلور یونٹ کے صدر پرکاش نے بتایا کہ نومبر میں جنتادل (ایس) کی جانب سے بنگلور حدود میں گھر گھر کمارنا پروگرام شروع کیا جائے گا جس کے ذریعہ کمارسوامی کی قیادت والی حکومت کو برسراقتدار لانے پر انجام دئے جانے والے پروگراموں کے تعلق سے عوام کو جانکاری دی جائے گی - انہوں نے بتایا کہ آنے والے بی بی ایم پی انتخابات میں پارٹی کو برسراقتدار لانا اور اسمبلی انتخابات میں جنتادل (ایس) کے بنگلور حلقہ سے 10 تا12اراکین اسمبلی کو منتخب کرانا اہم مقصد ہے - سابق وزیرلیلا دیوی آرپرساد اوررکن کونسل بھوجے گوڈا نے خطاب کرتے ہوئے بتایا کہ کمارسوامی کے دور میں کسانوں کا 28 ہزار کروڑ قرضہ معاف کیا گیا ہے -
اجلاس میں سنجے گوڈا، کرشنا ریڈی، نسرگا نارائن سوامی، سریش بابو، شرونا ودیگر حاضر رہے -آخر میں اجلاس میں شریک سابق وزیراعظم ایچ ڈی دیوے گوڈا کو تہنیت پیش کی گئی-