نئی دہلی،2؍جون (ایس او نیوز؍ایجنسی)ملک میں کورونا وائرس کی دوسری لہر کی وجہ سے سی بی ایس ای کلاس 12 کے امتحانات منسوخ کردیئے گئے ہیں۔ یہ فیصلہ وزیر اعظم نریندر مودی کی زیرصدارت منعقدہ اجلاس میں کیا گیا۔

مرکزی وزیر اطلاعات و نشریات پرکاش جاوڈیکر اور مرکزی وزیر دفاع راج ناتھ سنگھ کے علاوہ سکریٹری تعلیم اور وزارت تعلیم نے اس وبا کے پھیلنے کے درمیان سی بی ایس ای امتحانات کے انعقاد کے حوالے سے اس اعلیٰ سطحی اجلاس میں شرکت کی۔ اس اجلاس میں سی بی ایس ای کے چیئرمین نے بھی شرکت کی۔ اجلاس میں وزیر اعظم کو امتحان کے انعقاد کے تمام آپشنز کے بارے میں بتایا گیا۔

تاہم میٹنگ کے بعد یہ نتیجہ اخذ کیا گیا کہ کورونا بحران کے دوران سی بی ایس ای 12 ویں کے امتحان کا انعقاد کرنا مناسب نہیں ہوگا۔ اس کے بعد ان امتحانات کو منسوخ کرنے کا فیصلہ کیا گیا۔ بعد میں جب بھی امتحان لیا جائے گا بچوں کے والدین کو اس کے بارے میں بتایا جائے گا-

کورونا وائرس پھیلنے کی وجہ سے بورڈ کے امتحانات منسوخ کرنے کا مستقل مطالبہ کیا گیاہے۔ اس سلسلے میں دہلی کے وزیر اعلیٰ اروند کیجریوال نے وزیر اعظم کو ایک خط بھی لکھا۔ جس میں انہوں نے بچوں کے والدین کی تشویش کو مدنظر رکھتے ہوئے اس سال بھی گزشتہ سال کی طرح کارکردگی کی بنیاد پر نتائج جاری کرنے کی درخواست کی ہے۔

سی ایم کیجریوال نے امتحان منسوخ کرنے کے فیصلے کا خیرمقدم کرتے ہوئے کہا:مجھے خوشی ہے کہ کلاس 12 کے امتحان منسوخ کردئیے گئے ہیں۔ ہم سب بچوں کی صحت سے بہت پریشان تھے۔ یہ بڑی راحت ہے-اس کے ساتھ ہی 300 طلبا نے چیف جسٹس سپریم کورٹ کو ایک خط لکھا تھا - جس میں امتحان کے انعقاد کا از خود نوٹس لیا گیا تھا اور ان سے درخواست کی تھی کہ وہ اسے منسوخ کردیں۔ طلبا کا کہنا تھا کہ اس وبا کے درمیان امتحان کا انعقاد نہ صرف طلبا بلکہ ان کے کنبہ کے افراد، اساتذہ اور دیگر عملے کے لئے بھی ایک خطرہ ہے۔