بنگلورو۔24/مئی(ایس او  نیوز) ملک بھر میں مودی لہر کے سبب اقتدار پر بی جے پی کی شاندار واپسی کے بعد ریاست میں حکومت بدلنے کے متعلق قیاس آرائیوں کا بازار گرم ہوگیا لیکن اس دوران بتایاجاتاہے کہ بی جے پی کی مرکزی قیادت نے ریاستی بی جے پی صدر بی ایس یڈیورپا کو سخت ہدایت جاری کی ہے کہ کسی بھی حال میں کرناٹک کی حکومت کو گرانے کی کوئی کوشش نہیں کریں۔

مخلوط حکومت کے بیشتر اراکین اسمبلی انتخابی نتائج کے بعد اتحادی پارٹیوں کے خلاف کھلے عام بیان بازی پر اتر آئے ہیں، اس کے باوجود بھی سیاسی فائدہ اٹھانے کی کوشش نہ کرنے کے لئے واضح ہدایت دی گئی ہے۔ یہ بھی کہا گیا ہے کہ جب تک کہ مرکز میں حکومت سازی کا عمل اور کابینہ کی تشکیل پوری نہیں ہوجاتی اس وقت تک کرناٹک یا مدھیہ پردیش میں کانگریس حکومتوں کو نقصان پہنچانے کی کوشش نہیں کی جانی چاہئے۔ جیسے ہی انتخابی نتائج کل منظر عام پر آنے لگے کئی بی جے پی لیڈروں نے بیانات جاری کئے کہ ریاست میں مخلوط حکومت کسی بھی وقت گر سکتی ہے۔ ان تمام بیانوں کو دیکھتے ہوئے بی جے پی کی مرکزی قیادت سے کل دیر رات کرناٹک اور مدھیہ پردیش کی بی جے پی یونٹوں کو واضح طور پر ہدایت دی گئی کہ کسی بھی حال میں وہاں کی حکومتوں کو کمزور کرنے کی کوشش نہ کی جائے۔ اس دوران بتایا جارہاہے کہ برگشتہ کانگریس اراکین اسمبلی کا استعمال کرتے ہوئے آپریشن کمل کو آگے بڑھانے کی درپردہ کوششیں اپنی جگہ جاری ہیں۔