بی جے پی کو ترقی کا مطلب ہی معلوم نہیں ہے: رام لنگاریڈی
بنگلورو، 9؍اگست(ایس او نیوز)بی جے پی حکومت کے سربراہ ملک کی ترقی کے بارے میں سوچنے کی بجائے سرکاری ملکیت والے اداروں کو پرائیوٹائز کرنے اور صنعت کار ادانی اورامبانی کو مزید دولتمند بنانے میں لگے ہوئے ہیں،جس سے ملک کے عوام کو کئی مشکلو ں کا سامناکرناپڑرہاہے۔بی جے پی کو ترقی کا مطلب ہی معلوم نہیں ہے۔یہ بات سابق ریاستی وزیر ورکن اسمبلی رام لنگاریڈی نے کہی۔
انہوں نے یہاں انوگنڈ ناہلی کے متسندرامیں ہوبلی سطح کے کانگریس کارکنوں کے کنونشن کا افتتاح کرنے کے بعد اپنے خطاب میں کہاکہ بی جے پی حکومت نے اپنے آٹھ سالہ دوراقتدار کے دوران ایک کے بعد ایک عوام پر صرف بوجھ ہی ڈالاہے،عوام کو کوئی سہولت فراہم نہیں کی ہے اورنہ ہی ملک کی ترقی کی جانب توجہ دی ہے۔اشیاء ضروریہ کی قیمتوں میں اضافہ کرکے دولتمندوں کو فائدہ پہنچانے کی کوشش کی جارہی ہے۔وزیر اعظم نریندرمودی اوروزیر داخلہ امیت شاہ عوام کومشکل میں ڈال کر سیاست کررہے ہیں اورعوام کا پیسہ لوٹ کر امبانی اور ادانی کی جیب بھررہے ہیں۔
مقامی رکن اسمبلی شرت بچے گوڈا نے اپنے خطاب میں کہاکہ ریاست میں بی جے پی حکومت آپریشن کنول کے ذریعے بنی ہے،اسے عوام نے موقع نہیں دیاہے اور عوام کی طرف سے منتخب حکومت نہیں ہے۔پیسوں کے بل پر اقتدار پرآئی حکومت بدعنوانیوں سے گھری ہوئی ہے،پولیس سب انسپکٹرس اور اساتذہ کی تقرریوں میں بھی بدعنوانیاں کر کے تمام حدوں کو پار کردیا ہے،یہاں تک کہ ترقیاتی اور تعمیری کاموں میں بھی 40فیصد کمیشن حاصل کرکے ملک بھر میں ہی نہیں بلکہ دنیابھر میں بدنام ہوچکی ہے۔صرف عوام کا پیسہ لوٹنے والی حکومت پر سے عوام کا اعتماد اٹھ چکاہے اورآئندہ سال منعقد ہونے والے اسمبلی انتخابات میں عوام بی جے پی کو ضرو ر سبق سکھائیں گے۔سالانہ دوکروڑبے روزگار نوجوانوں کو روزگار فراہم کرنے کا وعدہ کرکے مرکز میں اقتدار حاصل کرنے والی نریندرمودی قیادت والی حکومت نے ملک کے بے روزگار نوجوانوں کو دھوکہ دیاہے اورکئی سرکاری اداروں کو پرائیویٹ والوں کے حوالے کر کے کروڑوں نوجوانوں کی زندگی کے ساتھ کھلواڑ کیاہے،آئندہ دنوں مرکزی حکومت کو بھی ملک کے عوام ضرور سبق سکھائیں گے۔
اس موقع پر گرام پنچایت کی صد ر روپا منی کرشناریڈی،پرکاش،سریش بابو،دیوراج،سید، بلاک کانگریس صدر لتا ریڈی اوردیگر موجود تھے۔
