پٹنہ،18؍جون (ایس او نیوز؍ایجنسی) بہار میں زبردست گرمی اور لُو کے تھپیڑوں سے لوگوں کا جینا دشوار ہو گیا ہے۔ حالات اتنے بدتر ہیں، اس کا اندازہ اسی سے لگایا جا سکتا ہے کہ مقامی میڈیا رپورٹوں کے مطابق پچھلے 3 دن کے دوران تقریباً 183 لوگوں کی موت ہو چکی ہے۔ اسپتال میں لُو لگنے سے بیمار ہوئے سیکڑوں مریض علاج کے لئے داخل ہیں۔ پٹنہ سمیت ریاست کے خاص شہروں میں درجہ حرارت 45 ڈگری کے آس پاس ہے۔ اسی بیچ شعبہ تعلیم نے اعلان کیا ہے کہ 22 جون تک ریاست کے سبھی سرکاری اسکول بند رہیں گے۔ گیا میں گرمی کو دیکھتے ہوئے انتظامیہ نے دفعہ 144 نافذ کی ہے۔

ریاست میں شعبہ تعلیم نے آرڈر دیا ہے کہ گرمی کی شدت کو دیکھتے ہوئے سبھی سرکاری اور امداد یافتہ اسکول 22 جون تک بند رہیں گے۔ آرڈر میں کہا گیا ہے کہ ریاست میں پڑ رہی زبردست گرمی کو دھیان میں رکھتے ہوئے گرمی کی چھٹیوں کے بعد اپنے ضلع میں قائم سبھی پرائمری سے لے کر سینئر سیکنڈری اسکول اسٹینڈرد کے اسکولوں کو ضرورت کے مطابق 30 جون تک صبح کی شفٹ میں چلانے کا فیصلہ کیا گیا تھا۔ ریاست میں دن بہ دن بڑھ رہی گرمی اور لُو کو دیکھتے ہوئے ریاست کے سبھی سرکاری اور امداد یافتہ اسکولوں میں 22 جون تک بچوں کے درس و تدریس کو بند کرنے کا فیصلہ کیا گیا ہے۔

گیا میں ڈی ایم نے زبردست گرمی کو دیکھتے ہوئے دفعہ 144 نافذ کی ہے۔ اس کے تحت چار سے زیادہ لوگ ایک جگہ پر اکٹھا نہیں ہو سکتے ہیں۔ اس کے علاوہ صبح 11 بجے سے شام 4بجے تک سبھی سرکاری اور غیر سرکاری تعمیراتی کاموں، منریگا کے تحت مزدوری کاکام اور کھلی جگہ پر کسی بھی طرح کے کلچرل پروگرام یا لوگوں کے اکٹھا ہونے پر پابندی لگا دی گئی ہے۔

بہار میں جان لیوا گرمی اپنے عروج پر ہے۔ مقامی میڈیا رپورٹ کے مطابق پیر کو نالندہ میں 6 اور اورنگ آباد میں 4 لوگوں کی لُو لگنے سے موت ہو گئی۔ اس سے پہلے اتوار کو لُو لگنے سے 112 سے زیادہ لوگوں کی موت ہو گئی۔ وہیں ہفتہ کو 61 لوگوں کی موت کی بات سامنے آئی تھی۔ سب سے زیادہ اموات اورنگ آباد، نوادا، پٹنہ، مشرقی بہار، روہتاس، جہان آباد اور بھوجپور اضلاع میں ہوئی ہیں۔ گیا، نوادا اور اورنگ آباد کے اسپتالوں میں 300 سے زیادہ مریض بھرتی کرائے گئے ہیں۔ ساتھ ہی نئے مریضوں کے آنے کا سلسلہ مسلسل جاری ہے۔ اکیلے گیا ضلع میں اتوار کو 28 لوگوں کی موت کی خبر ہے۔