بھٹکل 22/اگست (ایس او نیوز) نوائط کالونی میں واقع بھٹکل تعلقہ اسٹڈیم  میں نوائط کالونی  اُردو اسکول کے زیراہتمام  منگل کو   شہری حدود کے زونل لیول اسپورٹس مقابلے منعقد ہوئے جس میں  والدین نے الزام لگایا کہ  گراونڈ میں  بچوں کے لئے کسی بھی طرح کی سہولیات  فراہم نہیں کی گئی ہے۔ والدین اور سرپرستوں نے اسکول انتظامیہ پر الزام لگایا کہ  گرمی اور شدید دھوپ  سے بچنے کے لئے   بچوں سمیت ٹیچروں کے لئے بھی   میدان میں شامیانہ کا  کوئی انتظام نہیں کیا گیا ہے۔میدان میں ہی پینے کے پانی کا انتظام کرنے کے بجائے، میدان کے باہر پینے کے پانی کا انتظام کیا گیا ہے۔

اسکول کی طرف سے وضاحت پیش کرتے ہوئے  پی  ای ٹیچرمالینی نے بتایا کہ  زونل لیول اسپورٹس میں  26  اسکولوں نے حصہ لیا ہے، ہر اسکول سے 600 روپیہ  فیس لی گئی ہے،  اس رقم سے جو کچھ بھی ممکن تھا، ہم نے  سہولیات فراہم کرنے کی کوشش کی ہے، انہوں نے  بتایا کہ 26 میں سے 22 اسکول والوں نے فیس دی ہے، باقی اسکول کی طرف سے فیس بھی نہیں  ملی ہے۔  مزید بتایا کہ وصول شدہ رقم سے پروگرام کی افتتاحی تقریب کے لئے  اسکول کے باہر ہم نے شامیانہ اور اسٹیج لگایا ہے، اسکول میں ہی پینے کے پانی کا انتظام ہے، بچوں کے کھانے کا بھی انتظام کیا گیا ہے،  اسی  طرح میدان کے باہر جانے والے راستے پر علاقہ کے اسپورٹس سینٹر،  وائی ایم ایس اے  کی طرف سے بھی ٹھنڈے پانی کا انتظام ہے۔

ایک روزہ زونل لیول کے ان  اسپورٹس مقابلوں میں  گروپ ایونٹس کے تحت  اسکولی بچوں کے مابین کبڈی، والی بال اور کھوکھو کھیل کے مقابلے ہوتے ہیں، جبکہ سنگل ایونٹ میں سو میٹر، دو سو میٹر اور 1500 میٹر رننگ، ہائی  جمپ، لانگ جمپ، شارٹ پٹ وغیرہ جیسے  مقابلے ہوتے ہیں۔