بھٹکل:24/مئی (ایس اؤنیوز)اترکنڑا ضلع میں جنتا دل سکیولر (جے ڈی ایس )کافی مضبوط اور مستحکم پارٹی ہے، یہاںارٹی کے مداحوں اور لیڈروں کی بہت بڑی تعداد ہے، البتہ یہاں  ہمیں لیڈران کی قلت محسوس ہورہی ہے ، 30جون کے اندر ضلع میں 20-24ہزار عہدیداران کو نامزد کرتے ہوئے آئندہ ودھان سبھا انتخابات کی تیاری کی جائے گی اور ضلع میں جے ڈی ایس کو مزید مضبوط کیا جائے گا۔ یہ بات جے ڈی ایس لیڈر  اور ودھان پریشد کے رکن مری تپے گوڈا نے کہی ۔وہ یہاں بدھ کی شام نجی ہوٹل میں جے ڈی ایس بھٹکل کی طرف سے منعقدہ پریس کانفرنس میں بات کررہے تھے۔

انہوں کہاکہ گذشتہ ودھان سبھا انتخابات کے دوران ضلع بھر میں جے ڈی ایس ووٹوں کی گنتی کے حساب سے دوسرے نمبر پر رہی تھی ، جبکہ  ہمیں توقع ہے کہ اگلے 2018کے انتخابات میں ضلع میں کم سے کم 4حلقوں پر ہم جیت حاصل کریں گے۔ انہوں نے مزید بتایا کہ جنوبی ہندوستان میں عوام زیادہ تر علاقائی پارٹیوں کو ترجیح دیتے ہیں کیونکہ قومی پارٹیوں کی ناکامی ان کے سامنے واضح ہوچکی ہے۔ سابق وزیر اعظم دیوے گوڈا اور  سابق وزیر اعلیٰ کمار سوامی کی قیادت میں جے ڈی ایس مضبوط ہورہی ہے ، آئندہ انتخابات میں جے ڈی ایس زائد مقامات پر جیت حاصل کرے گی ۔ بے روزگاروں کو روزگار، کسانوں کے قرضے معاف، خواتین کے لئے خصوصی منصوبہ جات ہمارے انتخابی منشور کا حصہ ہوں گے۔

اخبارنویسوں کے سوالات کا جواب دیتے ہوئے مری تپے گوڈا نے کہا کہ جن  لوگوں نے  پارٹی سے فائدہ اٹھا کر دوسری پارٹی میں شمولیت اختیار کی ہے، اُن کے متعلق میں کچھ نہیں کہونگا، انہیں عوام ہی سبق سکھائیں گے۔ سابق وزیر آنند اسنوٹیکر جے ڈی ایس میں شامل ہونے کے تعلق سے پوچھے گئے سوال پر انہوں نے کہا کہ  ہمیں ایسی کوئی اطلاع نہیں ہے اس کا فیصلہ ہائی کمان کرے گا۔بھٹکل میں جے ڈی ایس کی ٹکٹ کے سوال پر انہوں نے جواب دیا کہ  بھٹکل حلقہ میں عنایت اللہ شاہ بندری بہت آگے ہیں اور وہ  پارٹی کو مضبوط کرنے کے لئے محنت کررہے ہیں، انہوں نے انکے علاوہ بھی جے ڈی ایس کے  پاس امیدوار ہونے کی بات کہی۔ نگراں کار یوگیندر، بی آر نائک، تروینی آنند گوڈا، گنپیا گوڈا، بھٹکل جے ڈی ایس صدر عنایت اللہ شاہ بندری ، ایم ڈی نائک ، ڈاکٹر فاروقی ، راجیشوری ہیگڈے ، جی این گوڈا وغیرہ موجود تھے۔