بنگلور،12؍ ستمبر (ایس او نیوز)مانسون   کے دوران بنگلور میں ڈینگی کے مریضوں کی تعداد میں مسلسل اضافہ ہو رہا ہے۔ مئی کے مہینے میں یہاں ڈینگی کے 102 کیس رپورٹ ہوئے جبکہ مانسون    کے آغاز کے بعد اگست تک ان کی تعداد بڑھ کر 1304 ہو گئی ہے۔ صرف اگست کے مہینے میں یہاں ڈینگی کے 677 نئے کیس رپورٹ ہوئے ہیں جو کہ مئی کے مقابلے میں چھ گنا زیادہ ہیں۔ تاہم بنگلور میونسپل کارپوریشن (بی بی ایم پی) کے عہدیداروں کے مطابق فی الحال ڈینگی کی وجہ سے زیادہ خطرہ نہیں ہے اور صورتحال کنٹرول میں ہے۔بی بی ایم پی کے مطابق مئی سے اگست تک ڈینگی کے 12203 نمونوں کی جانچ کی گئی۔ جن میں سے 1304 کیسز میں ڈینگی کی تصدیق ہوئی۔ مئی میں یہاں ڈینگی کے 102 کیس رپورٹ ہوئے۔ اسی دوران جون میں ڈینگی کے 174 کیسز پائے گئے۔ تاہم مون سون کے آغاز کے بعد ایک بار پھر یہاں ڈینگی کے کیسز میں اضافہ ہوا ہے۔ جولائی کے مہینے میں یہاں 351 کیس رپورٹ ہوئے جبکہ اگست کے مہینے میں ڈینگی کے 677 کیسز کی تصدیق ہوئی ہے۔ اگر ہم بی بی ایم پی کے آٹھ زونوں کی بات کریں تو مشرقی زون میں سب سے زیادہ 438 ڈینگی کیس رپورٹ ہوئے ہیں، جنوبی زون 319 کیسز کے ساتھ دوسرے نمبر پر ہے۔بی بی ایم پی کے چیف ہیلتھ آفیسر بی کے وجیندر کے مطابق اس میں کوئی شک نہیں کہ یہاں ڈینگی کے کیسز میں اضافہ ہوا ہے۔ تاہم اس وقت صورتحال تشویشناک نہیں ہے اور صورتحال مکمل طور پر کنٹرول میں ہے۔