بنگلورو، 6؍مارچ (ایس او نیوز؍ایجنسی) وزیر داخلہ بسوراج بومئی نے اعلان کیا ہے کہ ٹرافک قوانین کی پامالیوں کو قابو میں کرنے کے لئے ٹرافک پولیس کی طرف سے سڑکوں کے بیچوں بیچ یا کنارے پر کھڑے ہو کر گاڑیوں کو روکنے کی ضرورت نہیں ہے۔

انہوں نے کہا کہ آئے دن ٹرافک پولیس جوانوں کی طرف سے گاڑیوں کو روکے جانے کی وجہ سے ٹرافک میں خلل پڑنے کی شکایات موصول ہو تی ہیں۔ بعض اوقات ٹرافک پولیس کی طرف سے روکنے کی صورت میں بچ نکلنے کی کوشش کرنے والے افراد کی وجہ سے سڑک حادثا ت بھی ہو چکے ہیں اس لئے یہ احکامات دئیے گئے ہیں کہ سڑکوں پر گزرتی ہوئی ٹرافک کے درمیان گاڑیوں کو ہرگز نہ روکا جائے۔

وقفہ سوالات کے دوران جے ڈی ایس ممبررمیش گوڈاکے سوال کا جواب دیتے ہوئے وزیر داخلہ نے کہا کہ ٹرافک قوانین کی پامالیوں کی نشاندہی کے لئے جدید ترین ٹیکنالوجی کا استعمال کیا جائے اورکیمروں کی مدد سے جن پامالیوں کی نشاندہی کی جاتی ہے ان گاڑیوں کے مالکان کو نوٹس جاری کیا جائے۔

انہوں نے کہا کہ ٹرافک پولیس حکام کو یہ ہدایت دی گئی ہے کہ وہ ٹرافک قوانین کی پامالیوں کو روکنے کے لئے اپنی جو مہم چلاتی ہے اس کے دوران اس بات کو یقینی بنائے کہ  عوام کو پریشانی نہ ہونے پائے ۔