کرناٹک: سدرامیا بی جے پی پر ناراض؛ کہا؛’لوگوں کو مفت بجلی منصوبہ کے غلط استعمال کے لیے اکسا رہی ہے بی جے پی‘
بنگلورو، 5/جون (ایس او نیوز/ایجنسی) کرناٹک کے وزیر اعلیٰ سدارمیا نے پیر کے روز بی جے پی پر الزام عائد کیا کہ بی جے پی ریاست میں لوگوں کو 200 یونٹ تک مفت بجلی منصوبہ کا غلط استعمال کرنے کے لیے اکسا رہی ہے۔ انھوں نے کہا کہ بی جے پی لوگوں سے بغیر کسی احتیاط کے بجلی کا استعمال کرنے کے لیے کہہ رہی ہے لیکن ہم یہ یقینی کریں گے کہ مفت بجلی منصوبہ کا غلط استعمال نہ ہونے پائے اور لوگوں کے ذریعہ بجلی کے اندھادھند استعمال پر روک لگائی جائے۔
عالمی یومِ ماحولیات کے موقع پر بنگلورو کے گیان جیوتی جلسہ گاہ میں محکمہ جنگلات کے ذریعہ منعقدہ ایک تقریب کو خطاب کرتے ہوئےسدارمیانےکہاکہ ہماری حکومت نے غریبوں اور متوسط طبقہ کے فائدہ کے لیے بجلی کی مفت فراہمی کے منصوبہ کا اعلان کیا ہے۔ ہم نے لوگوں کو ان کے گزشتہ سال کے بجلی خرچ سے 10 فیصد زیادہ استعمال کرنے کی اجازت دی ہے۔ لوگوں نے اس منصوبہ کو خوشی کے ساتھ قبول کیا ہے، اور اس کا استقبال کیا ہے۔
وزیر اعلیٰ نے کہا کہ لوگوں نے جس پارٹی کو اقتدار سے بے دخل کردیا ہے، وہ پارٹی انھیں مفت بجلی منصوبہ کا غلط استعمال کرنے کے لیے اکسا رہی ہے اور اندھا دھند طریقے سے بجلی خرچ کرنے کو کہہ رہی ہے۔ انہوں نے بی جے پی کی اس حرکت کو عوام مخالف قرار دیتے ہوئےامید ظاہر کی کہ ریاست کے بیدار لوگ انھیں (بی جے پی والوں کو) اس منصوبہ میں ناکام بنائیں گے۔
واضح رہے کہ کانگریس حکومت نے انتخابی وعدے کے مطابق ’گرہ جیوتی یوجنا‘ کے تحت ریاست میں سبھی گھروں کو 200 یونٹ تک مفت بجلی دینے کا اعلان کیا ہے۔ یہ منصوبہ جولائی سے نافذ ہوگا۔ بجلی کے غلط استعمال سے بچنے کے لیے حکومت نے کہا تھا کہ مفت بجلی دیتے وقت ایک سال کے اوسط خرچ پر غور کیا جائے گا۔ جس پر بی جے پی نے اعتراض ظاہر کیا اور کہا کہ اس منصوبہ کو بغیر کسی شرط کے نافذ کیا جانا چاہیے۔