بنگلورو،22؍جنوری (ایس او نیوز) کافی جدوجہد کے بعد بنگلور انٹرنیشنل ایرپورٹ کے لئے ریلوے سرویس شروع کی گئی ہے لیکن یہ ریلوے سرویس صرف15دنوں میں ناکام ہوگئی؟

جی ہاں بنگلورو کے کیمپے گوڈا انٹرنیشنل ایرپورٹ کے لئے شروع کی گئی ریل سرویس ناکام ہوگئی ہے۔صرف 10روپئے اور 15روپئے کے عوض ایرپورٹ تک جانے اور واپس آنے کی سہولت کا جب اعلان کیا گیا تو یہ ایک بڑی خبر بنی تھی اور اس پر ایرپورٹ تک سفر کرنے والے اکثر مسافروں نے خوشی کا اظہار بھی کیا تھا۔

یہ ریلوے سرویس شروع کئے جانے کے 15دنوں میں ایک اور خبر آئی ہے جو قابل غور ہے۔ اس ریلوے سرویس کے لئے عوام کا تعاون نہیں ہے اس لئے کئی ٹرپ خالی جارہے ہیں۔جس سے ریلوے ڈپارٹمنٹ کو بھاری نقصان کا سامنا ہے۔پچھلے15دنوں میں گیارہ مرتبہ اس ریل کو خالی جانا پڑا اور واپس آنا پڑا۔ جس میں اس ریل کو 7مرتبہ ایرپورٹ کو خالی جانا پڑا اور 4بار خالی واپس آنا پڑا۔ یہ ریل بنگلورو کے سنگولی رائنا ریلوے اسٹیشن سے نکل کر یلہنکا ریلوے اسٹیشن اور ایرپورٹ ریلوے اسٹیشن پر رکے گی۔ اس ریل گاڑی میں بیک وقت610مسافروں کے سفر کرنے کی گنجائش ہے۔لیکن اب تک اس ریل میں سب سے زیادہ 149مسافر ہی سفر کرسکے ہیں۔اس وقت ہر پندرہ منٹ میں ایک ریل کی سہولت ہے۔ اس کو ہر آدھے گھنٹے میں ایک ریل سرویس شروع کرنے کی تجویز دی جارہی ہے تاکہ ایرپورٹ میں ملازمت کرنے والے ملازمین بھی اس ریل گاڑی کی سرویس سے استفادہ کریں۔ تب محکمہ زیادہ نقصان سے بھی بچ سکتا ہے۔