میسورو: قاتلانہ حملے میں زخمی تنویر سیٹھ کی حالت ابھی خطرے سے باہر نہیں۔ ڈاکٹروں کابیان
میسورو 18/نومبر (ایس اونیوز) شادی کی ایک تقریب میں شریک رکن اسمبلی تنویر سیٹھ پر جو قاتلانہ حملے میں زخمی ہوگئے تھے ان کا علاج کرنے والے کولمبیا ایشیاء اسپتال کے ڈاکٹروں کا کہنا ہے کہ ان کی حالت ابھی نازک بنی ہوئی ہے اور آئندہ 48گھنٹوں تک یقینی طور پر ان کی صحت کے بارے میں کچھ کہا نہیں جاسکتا۔
خیال رہے کہ تنویر سیٹھ جب شادی کی تقریب میں بیٹھے ہوئے تھے تو فرحان پاشاہ (۵۲سال) نامی شخص نے اچانک قصائیوں کے استعمال میں آنے والے چاپر سے گردن کے حصے پرحملہ کردیا تھا جسے بعد میں وہاں پر موجود لوگوں نے دبوچ کر پولیس کے حوالے کیا تھا۔اور زخمی تنویر سیٹھ کو فوری طور پر اسپتال میں منتقل کیا گیا تھا۔
کولمبیا ایشیاء ہاسپٹل کے ڈاکٹر اوپیندرا شینوئی نے بتایا کہ ”ان کے دماغ اور دل کو جوڑنے والی خون کی رگین اوردوسرے اعصاب کو گردن کے حصے میں نقصان پہنچا ہے۔ہم ان کا بلڈ شوگر اور بلڈ پریشر لیول نارمل سطح پر لانے کی کوشش کررہے ہیں۔ ان کے گردن بڑی حد تک کام کررہے ہیں۔ علاج کا مثبت اثر ہورہا ہے۔ پھر بھی آئندہ 48گھنٹوں تک کچھ کہنا مشکل ہے۔ا ن کو انتہائی نگہداشت میں رکھا گیاہے۔“
دوسری طرف پولیس نے بتایا کہ ملزم نے اقبال جرم کرتے ہوئے بتایا ہے کہ اس نے مایوسی اوراضطراب کی حالت میں یہ حملہ کیاتھا”ایم ایل اے کسی کے بھی کام نہیں آرہے تھے۔ کوئی ترقیاتی کام نہیں کررہے تھے۔اس لئے میں نے انہیں قتل کرنے کی ٹھان لی۔“لیکن پولیس یہ مان رہی ہے کہ ملزم کا یہ بیان مشکوک ہے۔ اس کے پیچھے اصل راز کیا ہے یہ جاننے کے لئے گہری تفتیش کی جارہی ہے۔