نئی دہلی،7؍اپریل (ایس او نیوز؍یواین آئی) پانچ ریاستوں میں منگل کے روز ہونے والی ووٹنگ کے دوران مغربی بنگال میں 78 فیصد، آسام میں 79 فیصد، کیرالا میں 70 فیصد تمل ناڈو میں 65 سے 70 فیصد کے بیچ اور پڈوچیری میں 78 فیصد رائے دہندگان نے اپنے حق رائے دہی کا استعمال کیا۔
الیکشن کمیشن کی رپورٹ کے مطابق مغربی بنگال میں تیسرے مرحلے کی پولنگ میں شام ساڑھے چھ بجے 78 فیصد رائے دہندگان نے ووٹ ڈالے۔ یہاں کی 31 سیٹوں پر 205 امیدوار انتخابی میدان میں ہیں جن کی قسمت کا فیصلہ 7.8 کروڑ ووٹر کریں گے ۔
آسام میں تیسرے اور آخری مرحلے میں 40 اسمبلی سیٹوں کے لیے 79 فیصد ووٹروں نے اپنے حق رائے دہی کا استعمال کیا۔ یہاں کل 7919641 رائے دہندگان 337 امیدواروں کی انتخابی قسمت کا فیصلہ کریں گے ۔ تمل ناڈو میں شام ساڑھے چھ بجے تک 65 سے 70 فیصد ووٹنگ درج کی گئی ۔ یہاں ایک ہی مرحلے میں 3998 امیدواروں کی انتخابی قسمت کا فیصلہ ہو گا۔
کیرالہ کی کل 140 سیٹوں پر ایک ہی مرحلے میں ووٹنگ کروائی جا رہی ہے ۔ یہاں ساڑھے چھ بجے تک 70 فیصد ووٹنگ ہوئی۔ پڈو چیری میں دو پہر ساڑھے چھ بجے تک 78 فیصد رائے دہندگان نے اپنے حق رائے دہی کا استعمال کیا۔ یہاں بھی ایک ہی مرحلے میں ووٹنگ کرائی گئی ۔