آشا کارکنوں کی جانب سے ہبلی میں احتجاج
ہبلی،23؍ستمبر(ایس او نیوز) ریاستی متحدہ آشا کارکنوں کی تنظیم، ہبلی شاخ کی جانب سے حکومت کی وعدہ خلافی کے خلاف ریاست گیر احتجاج کے پیش نظر یہاں بھی احتجاج منعقد کیا گیا۔
اس موقع پر خطاب کرتے ہوئے اے آئی سی یوٹی کے ضلع سکریٹری رمیش ہوسمنی نے کہا کہ گزشتہ 20 دنوں سے ریاست کے 42ہزار کورونا وائرس آشا کارکن کورونا کے خلاف خدمت انجام دے رہے ہیں اور مسلسل20/دنوں کی جدوجہد کے بعد وزیراعلیٰ نے تیقن دیا تھا کہ ان کی تنخواہ میں اضافہ کیا جائے گا۔
انہوں نے بتایا کہ وعدہ کئے ہوئے دو ماہ کا عرصہ گزرگیا لیکن حکومت نے اس پر عمل نہیں کیا اور کووِڈ کے اس موقع پر آشا کارکنوں کو تنخواہ نہ ملنے سے کافی مشکلات کا سامنا کرنا پڑرہا ہے۔
انہوں نے مطالبہ کیا کہ مرکزی اور ریاستی حکومتوں کی جانب سے کل 12ہزار روپئے اعزازی بھتہ آشا کارکنوں کو جاری کیا جائے۔
اس موقع پر خطاب کرتے ہوئے بھارتی شٹرنے کہا کہ گزشتہ 10تا 29جولائی جدوجہد اور 29جولائی کوریاست گیر سطح پر عوامی منتخب نمائندوں کے گھرو ں کامحاصرہ کرنے کے بعد حکومت نے مطالبات پورے کرنے کا وعدہ کیا لیکن اب تک اس پرعمل نہیں کیاگیا۔
انہوں نے حکومت سے مطالبہ کیا کہ حسب وعدہ تنخواہ میں اضافہ کیا جائے۔ آشا کارکنوں کو کووِڈ۔19 حفاظتی ساز وسامان فراہم کیا جائے۔گزشتہ دو سال سے باقی تنخواہ اور کووِڈ۔19کی امدادی رقم 3ہزار روپئے جاری کی جائے۔
