بینگلورو : نصابی کتب میں ترمیم کا تنازع - روہیت چکراتیرتھا کی گرفتاری اور وزیر تعلیم کے استعفیٰ کا مطالبہ - 18 جون کو مختلف تنظیمیں کریں گی احتجاجی مظاہرہ
بینگلورو،13؍ جون (ایس او نیوز) نصابی کتب میں ترمیم کے نام پر ریاستی گیت، ریاستی جھنڈے اور راشٹر کوی کوئمپو کی توہین کرنے والے نصابی کتب جائزہ کمیٹی کے سابق صدر روہیت چکرا تیرتھا کی گرفتاری اور اس کی حمایت کرنے والے وزیر تعلیم بی سی ناگیش کے استعفیٰ کا مطالبہ کرتے ہوئے 150 سے زائد مٹھ کے سربراہوں ، مختلف تنظیموں اور ہوراٹا سمیتیوں کی جانب سے 18 جون کو بینگلورو میں زبردست احتجاجی مظاہرا ہوگا۔
بتایا جاتا ہے کہ راجیہ اوکلیگا سنگھا ، وشوامانو کرانتی کاری مہا کوی کوئمپو ہوراٹا سمیتی ، دلت سنگھرش سمیتی ، کنڑا حامی لیڈران اور عہدیداران پر مشتمل آرگنائزنگ کمیٹی میں اس احتجاجی مظاہرہ کا فیصلہ کیا گیا ۔ 18 جون کو صبح 10 بجے سنگولی راینا ریلوے اسٹیشن سے فریڈم پارک تک احتجاجی جلوس نکالا جائے گا اور اس کے بعد یہ ریالی جلسہ میں تبدیل ہوجائے گی ۔ منتظمین نے 150 سے زائد مٹھ کے سوامیوں سے رابطہ قائم کرنے کا نشانہ طے کیا ہے ۔ اس کے علاوہ کسان تنظیموں ، دلت تنظیموں، سماج کے مختلف طبقات کے اداروں، خواتین کی تنظیموں ، طلبہ تنظیموں ،تعلیمی اور ادبی اداروں کے ذمہ داران کے علاوہ دانشوروں اور تعلیمی ماہرین کی بڑی تعداد اس مظاہرے میں شریک ہونے کی توقع ہے۔