بنگلورو، 22؍دسمبر(ایس او  نیوز) بیلگاوی میں ایم ای ایس تنظیم پر پابندی عائد کی جائے اور غنڈہ گردی کررہے افرا د کے خلاف سخت قانونی کارروائی کی جائے اورآئندہ اس طرح کی غنڈہ گردی کو موقع نہ دیاجائے۔یہ مطالبہ رکن اسمبلی انیتا کمار سوامی نے ریاستی حکومت سے کیا۔انہوں نے یہاں تعلقہ کے رام پور دیہات میں لوئیر پرائمری اسکول کی عمارت اور چنامارے گوڈنادوڈی کے لوئیر پرائمری اسکول کے افزود کمروں کے تعمیری کام کا سنگ بنیاد رکھنے کے بعد اخباری نمائندوں سے خطاب کرتے ہوئے کہاکہ ہمارا ملک سکیولر ملک ہے،ہر ایک زبان کے بولنے والوں کی عز ت کی جانی چاہئے۔شیواجی او ر سنگولی رائنادونوں ملک کی عظیم شخصیتیں ہیں،ایسے وطن پرستوں کی بے حرمتی ہر گز برداشت نہیں کی جاسکتی۔ایم ای ایس تنظیم نے سنگولی رائنا کے مجسمے کو نقصان پہنچاکر امن میں خلل ڈالنے کی کوشش کی ہے،سماج میں نفرت پھیلانے والوں پر سخت کارروائی کی جانی چاہئے اور تنظیم پر فوری پابندی عائد کی جانی چاہئے۔ انیتاکمار سوامی نے سابق اسمبلی اسپیکر کے آر رمیش کمار کے خلا ف برہمی ظاہر کرتے ہوئے کہاکہ عورت کو عزت کی نگاہ سے دیکھنے کے بجائے گندی ذہنیت کا مظاہرہ کر کے ایوان کے تقدس کو پامال کیاہے۔رمیش کمار کے اس رویے کی ملک بھر میں مذمت کی جارہی ہے اور ریاست کا نام بدنام ہواہے،ایوان میں مثالیں پیش کرنے کے لئے کئی اور معاملات تھے،مگر ایسے معاملوں کو مذاق بناکر عورتوں کی بے عزتی کی ہے۔آئندہ کوئی بھی عوامی نمائندہ اس طرح کے بیان نہ دے توبہتر ہے۔انہوں نے مزید کہا کہ ہر بچے کو تعلیم کی سہولت فراہم ہو ایسے انتظاما ت کئے جانے چاہئیں۔دیہی علاقوں میں تعلیم عام کرنے سے ہی دیہاتوں اور ملک کی ترقی ممکن ہوسکتی ہے۔ہر بچے کو معیاری تعلیم دی جانی چاہئے،اسی مقصد کے تحت دیہی علاقوں کے اسکولوں میں بنیادی سہولتوں کی فراہمی پر توجہ دی جارہی ہے۔انہوں نے کہاکہ اساتذہ کو چاہئے کہ بچوں کو معیاری تعلیم دیں اور انہیں اچھے شہری بنانے میں اہم کردار اداکریں۔کئی علاقوں میں اسکولی عمارتوں کی حالت خستہ ہے،اس لئے ضلع پنچایت،تعلقہ پنچایت اور رکن اسمبلی کے فنڈ سے اسکولی عمارتوں کی مرمت کا کام کیاجارہاہے۔ تمام سرکاری اسکولوں میں بنیادی سہولتیں فراہم کرنے کیلئے ضروری اقدامات کئے گئے ہیں۔سرکاری اسکولوں میں اچھاماحول قائم کیاگیا تو طلباء کی تعداد میں بھی اضافہ ہوگا۔انیتا کمارسوامی نے کہا کہ رام نگرم اسمبلی حلقے کو سابق وزیر اعلیٰ ایچ ڈی کمار سوامی نے خصوصی ترجیح دی ہے اوریہاں پالی ٹیکنیک، انجینئرنگ کالج، لاء کالج کیلئے منظوری دی ہے۔آئندہ بھی اسی طرح تعلیم کے شعبے پر توجہ دی جائے گی۔اس موقع پر جے ڈی ایس تعلقہ صدر راج شیکھر،بی اومیش،رام کرشنا،مہادیو،جئے کمار اور دیگر موجود تھے۔