انتخابات میں جیت کیلئے تمام طرح کے ہتھکنڈے اپنائے: سونیا گاندھی
را ئے بریلی13جون (ایس او نیوز/ آئی این ایس انڈیا) یو پی اے چیئر پرسن سونیا گاندھی نے اپنے پارلیمانی حلقہ رائے بریلی کے پروگرام میں نریندر مودی اور بی جے پی پر نشانہ لگایا۔ بدھ کو انہوں نے کہا کہ مرکز کے اقتدار میں رہنے اور نریندر مودی کو وزیر اعظم بنائے رکھنے کے لئے حکمراں جماعت (بی جے پی) نے اخلاقیات کی تمام حدیں پار دیں۔ ووٹروں کو لبھانے کے لئے ہر طرح کے ہتھکنڈے اپنائے۔ سب جانتے ہیں کہ لوک سبھا انتخابات میں جو کچھ بھی ہوا، وہ اخلاقی تھا یا غیر اخلاقی؟ اس سے قبل سونیا اور پرینکا گاندھی نے عہدیداروں کے ساتھ جائزہ میٹنگ بھی کی۔ لوک سبھا انتخابات کے بعد ر ائے بریلی پہنچیں سونیا نے کہا کہ گزشتہ کچھ سالوں میں ہمارے انتخابی عمل میں کئی طرح کے شک ابھر کر سامنے آئے ہیں، اس سے بڑی بدقسمتی نہیں ہو سکتی کہ اقتدار بچانے کے لئے اخلاقیات سے سودا کرلیا گیا۔ اس دوران پرینکا نے کانگریس کی ہار کے لئے کارکنوں کو ذمہ دار ٹھہرایا۔ انہوں نے کہا کہ میں یہاں کوئی تقریر نہیں کروں گی، لیکن مجھے بولنے کے لئے کہا جا رہا ہے تو سچ بتاتی ہوں، میں ان کارکنوں کا پتہ کروں گی، جنہوں نے پارٹی کے لئے انتخابات کے دوران کام نہیں کیا۔سونیا گاندھی نے پہلی بار رائے بریلی سے 2004 میں انتخاب لڑاتھا اور اس کے بعد سے اب تک وہ یہاں کی ایم پی ہیں۔ عام طور پر باقی پارٹیاں کانگریس کو اس سیٹ پر واک اوور دیتی آئی ہیں؛ لیکن، اس بار سونیا کے ہی کبھی خاص رہے لیڈر دنیش سنگھ نے بی جے پی کے ٹکٹ پر سونیا کو چیلنج کیا تھا۔ تاہم اس انتخابات میں سونیا نے انہیں ڈیڑھ لاکھ سے زیادہ ووٹوں کے فرق سے شکست دی۔