نئی دہلی،20/جون (ایس او نیوز/ آئی این ایس انڈیا) ایک ملک ایک انتخاب کے معاملے پر وزیر اعظم نریندر مودی کی طرف سے منعقدہ میٹنگ میں شامل نہیں ہونے والی کانگریس نے بدھ کو الزام لگایاہے کہ ایسے معاملے حقیقی مسائل سے توجہ ہٹانے کے لیے اٹھائے جا رہے ہیں اور حکومت اگر اس معاملے میں واقعی سنجیدہ ہے تواسے اس پر پارلیمنٹ میں بحث کرانی چاہیے۔کانگریس کے ترجمان گورو گوگوئی نے پارٹی ہیڈ کوارٹر میں منعقدہ پریس کانفرنس میں کہا کہ ملک میں بے روزگاری، بدحال معیشت جیسے ان گنت مسائل ہیں، جن پرحکومت توجہ نہیں دے رہی ہے اور وہ اپوزیشن کی طرف سے اٹھائے جانے والے سوالات کو نظر انداز کررہی ہے۔کانگریس سمیت کئی اپوزیشن پارٹیوں نے متعددبارحکومت سے انتخابی عمل بہتر بنانے کے لیے اقدامات کرنے کی اپیل کی ہے اور الیکٹرانک ووٹنگ مشین(ای وی ایم) کے ساتھ ہی وی وی پیٹ کا مطالبہ کیا ہے لیکن کبھی حکومت نے اس کی اس درخواست پر توجہ نہیں دی ہے۔