آل انڈیا مسلم پرسنل لا بورڈ کی وضاحت ؛ بورڈ کسی سیاسی جماعت کی حمایت یا مخالفت نہیں کرتا
نئی دہلی 19؍اپریل (ایس او نیوز) آل انڈیا مسلم پرسنل لا بورڈ کے دفتر سے جاری پریس ریلیز میں اس بات کی وضاحت کی گئی ہے کہ بورڈ کے نائب صدر جناب پرو فیسر ڈاکٹر سید علی محمد نقوی صاحب کی طرف سے بی جے پی کی حمایت کرنے کے تعلق سے جو بات سامنے آئی ہے وہ ان کی ذاتی رائے ہوسکتی ہے اس کا آل انڈیا مسلم پرسنل لا بورڈ سے کوئی تعلق نہیں ہےاسی طرح بہار میں این ڈی اے کی حمایت میں جناب ڈاکٹر خالد انور صاحب ایم ایل سی نے بھی بورڈ کے ذمہ داروں کی حمایت کی بات کہی ہے وہ بھی بالکل بے بنیاد ہے اور انہوں نے غلط بیانی سے کام لیا ہے جبکہ شروع دن سے آل انڈیا مسلم پرسنل لا بورڈ پارلیمانی سیاست سے اپنے آپ کو دستور کی روشنی میں دور رکھتا آیا ہے. بورڈ کے جنرل سکریٹری حضرت مولانا محمد فضل الرحیم مجددی صاحب نے پریس ریلیز کے ذریعے واضح کیا ہے کہ آل انڈیا مسلم پرسنل لابورڈ نہ کبھی کسی متعین پارٹی کی تائید کرتا ہے اور نہ مخالفت۔ نائب صدر بورڈ کا بی جے پی کی حمایت میں بیان ان کی اپنی ذاتی رائے تو ہوسکتی ہے، مگر اس کو بورڈ کا بیان ہرگز نہ سمجھاجائے، اسی طرح خالد انور صاحب جس طرح کی باتیں کررہے ہیں وہ بھی بے بنیاد اور غلط ہیں ان بیانوں سےمسلم پرسنل لا بورڈ کا کوئی تعلق نہیں ہے، اس لیے لوگ غلط فہمی میں مبتلا نہ ہوں اور اس انتخابی موقع پر بورڈ کے کسی ذمہ دار یارکن کا سیاسی حمایت یا مخالفت میں دئیے گئے کسی بھی بیان کو بورڈ سے جوڑ کر نہ دیکھاجائے، بورڈ اول دن سے اپنے دستور پر عمل کرتا آیا ہے اور آگے بھی وہ اپنے دستور کی روشنی میں عمل کریگا، اس لئے کسی قسم کی غلط فہمی کے شکار نہ ہوں۔