بے قصور نوجوانوں کو رہا کرنے اکھنڈ سرینواس مورتی کی پولیس سے نمائندگی
بنگلورو،22؍اگست (ایس او نیوز) بنگلورو کے کے جی ہلی اور ڈی جے ہلی پولیس تھانوں کی حدود میں 11؍اگست کی شام پیش آنے والے پُرتشدد واقعات کے سلسلہ میں جن نوجوانوں کو پولیس کی طرف سے گرفتار کیا گیا ہے ان میں شامل بے قصور نوجوانوں کو رہا کرنے کے لئے پلکیشی نگر حلقہ کے رکن اسمبلی آر اکھنڈ سرینواس مورتی نے جمعہ کے روز ڈی جے ہلی پولیس تھانے پہنچ کر پولیس حکام سے نمائندگی کی۔ ان سے درخواست کی کہ پولیس کی طرف سے گرفتاریوں کے دوران اگر بے قصور نوجوانو ں کو پکڑ اگیا ہے تو ان کے معاملوں کی جانچ فوری طور پر پوری کر کے انہیں رہا کیا جائے۔
پولیس تھانے میں حکام سے ملاقات کے بعد اخباری نمائندوں سے بات کرتے ہوئے سرینواس مورتی نے بتایا کہ تشدد کے دوران شرپسندوں نے ان کا اور ان کے بھائیوں اور دیگر رشتہ داروں کے گھرجلا دئیے، اس لئے وہ کچھ دن تک پریشان رہے،اب ان کے علم میں مقامی مسلم قائدین نے یہ بات لائی ہے کہ پولیس کی طرف سے شرپسندوں کو گرفتار کرنے کے لئے کی گئی کارروائی کی زد میں کئی بے قصور نوجوان بھی آ گئے ہیں، اس لئے انہوں نے مناسب سمجھا کہ جو بھی بے قصور پولیس کی تحویل میں ہیں ان کو بلا تاخیر رہا کرنے کے لئے پولیس حکام سے درخواست کریں۔
انہوں نے کہا کہ حکام سے انہوں نے اس سلسلہ میں درخواست کی ہے اور انہوں نے اس پر مناسب کارروائی کا تیقن دلایا ہے۔ سرینواس مورتی نے یہ بات دہرائی کہ حلقہ بھر میں برسوں سے ہندو، مسلم،دلت نیز تمام طبقات مل جل کر رہ رہے ہیں۔ ایک شر پسند کی حرکت کے نتیجے میں علاقے میں باہر کے لوگوں نے ہنگامہ مچایا اور بدقسمتی سے علاقے کے کچھ گمراہ نوجوان بھی اس کا حصہ بن گئے۔ پولیس ان تمام کی سی سی ٹی وی مناظر کی بنیاد پر نشاندہی کر رہی ہے۔ لیکن اس کارروائی کی زد میں بے قصور نوجوان نہ آنے پائیں پولیس حکام سے انہوں نے گزارش کی ہے۔ اس موقع پر سرینواس مورتی کے ہمراہ مقامی مسلم قائدین اور مساجد کے ذمہ دار بھی موجود تھے۔