منگلورو سے ابوظہبی کے لئے 22 جولائی سے شروع ہوں گی ایئر انڈیا ایکسپریس کی روزانہ پروازیں
منگلورو، 12/ جون (ایس او نیوز) ایئر انڈیا ایکسپریس (XI) نے منگلورو انٹرنیشنل ایئر پورٹ سے ابوظہبی کے لئے روزانہ پروازیں شروع کرنے کا منصوبہ بنایا ہے جس پر 22 جولائی سے عمل شروع ہو جائے گا ۔
فی الحال یو اے ای کے صدر مقام کے لئے ایئر انڈیا کی طرف سے ہفتے میں چار پروازیں چل رہی ہیں جو منگل، جمعرات، سنیچر اور اتوار کے دن مہیا رہتی ہیں ۔ اب ایئر انڈیا کی طرف سے ابوظہبی کے لئے روزانہ پروازیں شروع کرنے اور بینگلورو کے لئے انڈیگو اور انڈیا کی پروازیں دوبارہ شروع کرنے کی وجہ سے یہاں سے بینگلورو کے لئے دستیاب ہونے والی پروازوں کی تعداد بڑھ کر 8 ہو جائے گی ۔
ایئر انڈیا کی بینگلورو سے منگلورو تک کی پروازیں مکمل طور پر گھریلو مسافروں کے لئے ہوں گی جبکہ ابوظہبی جانے والے مسافروں کو منگلورو انٹرنیشنل ایئر پورٹ سے طیاروں میں سوار ہونا پڑے گا ۔ یکم اگست سے بینگلورو - مینگلورو سیکٹر میں ہفتے کے تین دن یعنی پیر، بدھ اور جمعہ کو کُل 8 پروازیں دستیاب رہیں گی ۔ جبکہ انڈیگو ایئر لائنس کی پانچ پروازیں مہیا رہیں گی ۔
بین الاقوامی پروازوں کی بات کریں تو اس وقت منگلورو انٹرنیشنل ایئر پورٹ سے دبئی کے لئے ایئر انڈیا کی روزانہ دو پروازیں،انڈیگو کی ہفتے میں چار پروازیں دستیاب رہتی ہیں ۔ اسی طرح دمام کے لئے ہفتے میں چار پروازیں، مسقط کے لئے تین، دوحہ اور بحرین کے لئے دو اور کویت اور جدہ کے لئے ہفتے میں ایک پرواز ایئر انڈیا کی طرف سے دستیاب رہتی ہے ۔