بنگلورو،13؍مئی (ایس او نیوز) کرناٹک میں کورونا وائرس کے متاثرین کی تعداد دن بہ دن بڑھتی جارہی ہے۔ منگل کے روز کرناٹک میں نئے کیسوں کا ایک نیا ریکارڈ بن گیا جو ریاست کے مختلف اضلاع سے 63 کیس سامنے آئے جس کے ساتھ ہی ریاست میں متاثرین کی تعداد بڑھ کر 925 تک پہنچ گئی۔

لاک ڈاؤن میں نرمی کے بعد کورونا وائرس کے واقعات ان اضلاع میں سامنے آنے لگے ہیں جو اب تک گرین زون میں تھے۔

منگل میں کے روز بنگلورومیں 4، باگل کوٹ میں 15، ہاسن میں 5، دھارواڑ میں 9، کولار میں 5، داونگیرے میں 12، گدگ میں 3، بیدر میں 2 کیس سامنے آئے۔ صبح میں 41 معاملات سامنے آئے اور شام کے بلیٹن میں 21 معاملات سامنے آئے ہیں۔ دکشن کنڑا میں2 اور متاثرین کی تصدیق ہوئی ہے۔ ان متاثرین کو منگلورو کے وینلاک اسپتال میں داخل کیا گیا ہے۔

ریاست میں اب تک مارے گئے افراد کی تعداد 32 تک پہنچ چکی ہے اور 426 افراد صحت مند ہوکر اسپتالوں سے رخصت کئے جاچکے ہیں۔

کولار ضلع کے ملباگل سے جو 5 معاملے سامنے آئے ہیں ان میں سے 3 اُڑیسہ سے یہاں لوٹے تھے۔ ایک چنئی سے آیا تھا۔ دو کے رابطہ کی نشاندہی کا سلسلہ جاری ہے۔ بنگلورو میں جو 4 معاملے سامنے آئے ہیں ان میں سے 3 متاثر نمبر 454 کے ربط میں تھے ان تمام کو بنگلورو کے کووڈ اسپتال میں داخل کروادیا گیا ہے۔

بنگلورو کے ایک اور متاثر کے رابطہ کی نشاندہی جاری ہے۔ اس دوران یہ بات سامنے آئی ہے کہ بنگلورو کے بمن ہلی علاقے میں آنے والے ہونگاسندرا کے میدنہ نگر علاقے میں 3 متاثرین کی نشاندہی کے بعد اس علاقے کو سیل ڈاؤن کیا جاچکاہے اور متاثرین کے ربط میں آنے والے افراد کو کوارنٹائن کی جاچکا ہے۔

بنگلورو میں اب تک متاثرین کی تعداد 182 ہوچکی ہے، بیلگاوی میں 113، میسورو میں 90 اور داونگیرے میں 83 افراد متاثر ہوئے ہیں۔ کلبرگی میں 73 اور باگل کوٹ میں 68 افراد متاثر ہوئے ہیں۔ ریاست کے گرین زون میں شامل کولار میں 5؍افراد متاثر ہوئے ہیں جبکہ کرناٹک کے سیاسی طور پر انتہائی حساس سمجھنے جانے والے ہاسن ضلع میں جو اب تک گرین زون میں رہا 5 کورونا کیس سامنے آئے ہیں۔

منگل کے روز ریاست کے مختلف اسپتالوں میں صحت یاب ہونے والے 7؍افراد کو رخصت کیا گیا۔