مہاراشٹرا میں بارش کا قہر جاری، رتناگیری میں ڈیم ٹوٹنے سے 6 افراد ہلاک، 19 لاپتہ، 12 مکانات بہہ گئے
ممبئی 3/جولائی (ایس او نیوز) مہاراشٹرا میں بارش کا سلسلہ جاری ہے جس کے دوران رتنا گیری میں ایک ڈیم ٹوٹنے سے بڑا حادثہ پیش آنے کی اطلاع موصول ہوئی ہے۔ ذرائع سے ملی اطلاع کے مطابق رتناگیری کے چپلون تعلقہ میں واقع تیوارے ڈیم ٹوٹنے سے ڈیم کے نیچے بسے سات گاوں میں سیلاب جیسی صورتحال پیدا ہو گئی جس میں کئی لوگوں کی بہنے کی خبریں ہیں۔ اب تک ملی اطلاع کے مطابق چھ لوگوں کو نعشیں برآمد کی جاچکی ہیں جبکہ 19 سے زائد لوگ ہنوز لاپتہ بتائے گئے ہیں۔ ذرائع کے مطابق ڈیم ٹوٹ کر پانی کے تیز بہاو میں آکر 12 مکانات بھی ڈہہ گئے ہیں۔ بتایا گیا ہے کہ این ڈی آر ایف کی ٹیم لگاتار راحت کے کاموں میں لگی ہوئی ہے۔
اطلاع کے مطابق حادثے کی خبر ملتے ہی ضلعی انتظامیہ نے راحت رسانی کا کام شروع کردیا ، اور این ڈی آر ایف کی ٹیم کو جائے وقوع پر روانہ کردیا۔
لگاتار بارش کی وجہ سے ڈیم میں پانی کی سطح بڑھ گئی تھی، خیال رہے کہ مہاراشٹرا میں اتوار سے مانسون کی زوردار بارش جاری ہے۔ رپورٹ کے مطابق ڈیم ٹوٹتے ہی پانی بےقابو ہوکر تیز رفتاری کے ساتھ گاوں کے اندر گھسنا شروع کردیا اور سیلاب جیسی صورتحال پیدا ہوگئی، جس کی زد میں آکر 12 مکانات پوری طرح سے سیلاب میں بہہ گئے۔ بتایا جارہا ہے کہ ان ہی مکانوں میں رہنے والے لوگ بھی سیلاب میں بہہ گئے تھے جس میں سے 6 لوگوں کی نعشیں برآمد کی جاچکی ہیں۔
تیوارے ڈیم دو دہائی قبل تعمیر کیا گیا تھا، منگل کی شب قریب دس بجے یہ ڈیم ٹوٹ گیا۔ جولوگ لاپتہ ہوئے ہیں، اُن کا تعلق چار خاندانوں سے ہے۔ میڈیا رپورٹوں کے مطابق متاثرہ دیہاتوں میں قریب ایک ہزار لوگ رہائش پذیر ہیں اور سیلاب جیسی صورتحال پیدا ہونے کے بعد ان کا رابطہ باقی دنیا سے تقریبا ٹوٹ گیا ہے۔
راحت ایجنسیوں کو توقع ہے کہ ڈیم کے پانی میں بہہ کر لاپتہ ہونے والے لوگ نشیبی علاقوں میں مل سکتے ہیں۔ ضلعی انتظامیہ کے ساتھ ساتھ پولس اور دیگر سماجی ادارے بھی راحت کے کاموں میں مصروف ہیں۔
ممبئی سمیت مہاراشٹرا کے کئی علاقوں میں اتوار سے بھاری بارش جاری ہے جس سے اب تک 40 سے زائد لوگ ہلاک ہوچکےہیں، 70 سے زائد لوگ زخمی ہوئے ہیں، ان میں ممبئی، تھانے اور پونے میں دیوار گرنے سے مرنے والے لوگ بھی شامل ہیں۔ بھاری بارش کی وجہ سے ٹرین سروس کے ساتھ ساتھ ہوائی سروس بھی بری طرح متاثر ہوئی ہے۔