بنگلورو،14؍ستمبر(ایس او نیوز) بنگلور میٹرو پالیٹن ٹرانسپورٹ کارپوریشن (بی ایم ٹی سی) نے طلباء کی طرف سے رعایتی بس پاس حاصل کرنے کے لئے داخل کردہ کل 38,224 درخواستوں کو اب تک رد کر دیا ہے اور اس کے لئے یہ وجہ بیان کی گئی ہے کہ ان کے تعلیمی اداروں کی طرف سے ان طلباء کی تفصیلات مناسب انداز میں فراہم نہیں کی گئی ہیں۔حیرت کی بات یہ بھی ہے کہ نئی درخواستوں کے علاوہ کل 20,545 تجدید کی درخواستیں بھی مسترد کر دی گئی ہیں۔بی ایم ٹی سی نے بتایا ہے کہ اب تک اسے 3,38,265 درخواستیں موصول ہوئی ہیں اور کل جمع کردہ درخواستوں میں سے 1,86,370 ھلباء کو نئے پاس جاری کئے گئے ہیں جبکہ بی ایم ٹی سی نے مزید 19,825 درخواستوں کو بھی منظوری دے دی ہے اگرچہ کہ ان میں سے زیادہ تر درخواستوں کی رقم جمع نہیں کی گئی ہے،دوسرے معاملات کے تعلق سے افسران کا کہنا ہے کہ انہوں نے طلباء کو ہدایت دی ہے کہ پاس حاصل کرنے کے لئے اپائنٹمنٹ حاصل کر لیں۔ بی ایم ٹی سی کے ایک افسر نے کہا کہ ”درخواستیں کئی وجوہات کی بنا کر رد کی جا سکتی ہیں، جیسے مناسب انداز کی تصویر کا نہ ہونا یا درخواست نامہ کا مکمل نہ ہونا وغیرہ۔اس سے پہلے درخواستوں کی حیثیت کے تعلق سے طلباء کو معلومات فراہم کرنے کا کوئی نظام نہیں تھا البتہ اب ہم نے جن طلباء کی درخواستوں کو رد کیا گیا ہے انہیں ایس ایم ایس اور ای میل کے ذریعہ تفصیلات فراہم کئے ہیں، ہم نے ان سے یہ بھی کہا ہے کہ ضروری تفصیلات کے ساتھ دوبارہ درخواست جمع کریں“۔طلباء اب بھی اسمارٹ کارڈ حاصل کرنے کے لئے درخواست دے سکتے ہیں، مذکورہ افسر نے مزید کہا کہ ”اس وقت شہر کے مختلف مقامات پر ہماری طرف سے روزانہ 9,000 اسمارٹ کارڈ جاری کئے جا سکتے ہیں، البتہ اس ماہ کے ختم ہونے کے بعد ہی ایک واضح نقشہ ابھر کر ہمارے سامنے آسکتا ہے کہ کتنے طلباء کو اسمارٹ کارڈ جاری کیا گیا ہے“۔بی ایم ٹی سی نے شہر کے 26 مختلف مقامات پر طلباء کے لئے رعایتی بس پاس جاری کرنے کی خاطر کل 92 مراکز قائم کر رکھے ہیں جہاں طلباء اپنے اسمارٹ کارڈ حاصل کرنے کے لئے درخواست دے سکتے ہیں، ان میں سے بارہ مراکز مجسٹک بس اڈہ پر قائم ہیں جبکہ وجے نگر اور شانتی نگر بس اڈہ پر فی کس آٹھ آٹھ مراکز کام کر رہے ہیں۔ کارپوریشن نے اس سے قبل یہ بیان جاری کیا تھا کہ جون کی 17 تاریخ سے شہر کے 15 مختلف مقامات پر طلباء کے رعایتی بس پاسوں کی طباعت کی جا رہی ہے، پچھلے سال بی ایم ٹی سی نے درخواست جمع کرنے کے نظام کو اپنے ویب سائٹپر منتقل کر دیا تھا۔