بنگلورو شہر کی سڑکوں پر3لاکھ ایل ای ڈی لائٹس لگائے جائیں گے:بسوراج بومئی
بنگلورو،15؍ستمبر(ایس او نیوز)وزیر اعلیٰ بسوراج بومئی نے ریاستی اسمبلی میں اعلان کیا کہ شہر بنگلورو میں برہت بنگلورو مہانگرپالیکے (بی بی ایم پی) کی حدود میں 3لاکھ ایل ای ڈی لائٹوں کی تنصیب کو منظوری دی گئی ہے، آنے والے دنوں میں اس منصوبے کو تیز ی سے عملی شکل دی جائے گی۔ وقفہ ئسوالات میں داسرہلی کے رکن اسمبلی آر منجوناتھ کے سوال کا جواب دیتے ہوئے بومئی نے کہا کہ پانچ مراحلوں میں اس پراجکٹ کو پورا کرنے کے لئے عالمی ٹینڈر منظور کیا گیا ہے اور ملک کی مشہور کمپنی شاپورجی پلونجی نے اس کی ذمہ داری لی ہے۔ انہوں نے بتایا کہ اس کمپنی نے شہر بھر میں بجلی کی کھپت کو کم کرنے کے لئے تین لاکھ ایل ای ڈی لائٹس لگانے کے کام کو 5مرحلوں میں پورا کرنے کا اعلان کیا ہے۔وزیر اعلیٰ نے کہا کہ انہوں نے ہدایت دی ہے کہ پانچوں مرحلوں کو ایک ساتھ شروع کیا جائے تاکہ شہر میں جہاں بھی بجلی کے کھمبوں کے لئے لائٹ کی ضرورت ہو اس کو فوری طور پر پورا کیا جا سکے۔انہوں نے کہا کہ عوامی و نجی شراکت کی بنیاد پر ان لائٹوں کی تنصیب سے بجلی کی کھپت میں 85فیصد کی کمی آسکتی ہے۔ انہوں نے کہا کہ بی بی ایم پی کی حدود میں 485286بجلی کے کھمبے ہیں۔ ان تمام کھمبوں کو ایل ای ڈی لائٹس لگانے کے لئے 30ماہ میں کام پورا کرنے کا معاہدہ ہوا لیکن اب تک اس کام کی شروعات نہیں ہو سکی ہے۔ مسٹر بومئی نے کہا کہ اس کام کو جلد شروع کرنے یا ہر ہفتہ کام میں تاخیر کرنے والی کمپنی پر ایک لاکھ روپے کا جرمانہ لگانے کے لئے ہدایت دی جا رہی ہے۔ وزیر اعلیٰ نے بتایا کہ اس پراجکٹ کے پہلے مرحلہ میں شہر کے راجہ راجیشوری نگر، داسرہلی اور بمن ہلی ڈیویژن میں سروے جون 2020کے دوران کروایا گیا۔لاک ڈاؤن کی پابندیوں کے سبب اس میں رکاوٹ پیدا ہوئی۔انہوں نے کہا کہ کنٹراکٹرو ں کو نوٹس جاری کر کے مقررہ وقت میں اس کام کو آگے بڑھانے کی ہدایت دینے کے لئے انہوں نے بی بی ایم پی کے افسرو ں سے کہا ہے۔ اس مرحلہ میں بسوراج بومئی نے تیقن دلایا کہ اس کام کے پورے ہونے تک شہر میں جہاں بھی بجلی کے کھمبوں کے لائٹ بدلنے کی ضرورت ہوگی اس کو بی بی ایم پی کی طرف سے ہی بدلنے کے لئے فوری طور پر ہدایت جاری کی جائے گی۔ انہوں نے بتایا کہ شیواجی نگر اور راجہ راجیشوری نگر میں ایل ا ی ڈی لگانے کا کام شروع کیا جا چکا ہے۔ داسر ہلی میں سروے کا کام پورا ہو چکا ہے ترجیحی بنیاد پر وہاں کام شروع کرنے کی ہدایت دی جائے گی۔شہر کے دیگر اراکین اسمبلی رام لنگا ریڈی، روی سبرمنیا، اروند لمباولی اور دیگر نے وزیر اعلیٰ سے مانگ کی کہ جب تک کہ اس پراجکٹ پر کام پورا نہیں ہو جاتا اس وقت تک بی بی ایم پی کو ہدایت دی جائے کہ جہاں بھی لائٹ بدلنے کی ضرورت پڑے وہاں لائٹ بدلی جائے وزیر اعلیٰ نے اس سے اتفاق کرتے ہوئے فوری طور پر اس سلسلہ میں بی بی ایم پی چیف کمشنر کو ہدایت دینے کا یقین دلایا۔