بنگلورو،6/ مئی (ایس او نیوز) کرناٹک میں کورونا وائرس کا قہر دن بہ دن شدت اختیار کرتاجارہا ہے۔ منگل کے روز ریاست میں 22نئے معاملوں کی نشاندہی کی گئی جس کے ساتھ ہی ریاست میں متاثرین کی تعداد بڑھ کر 673تک پہنچ گئی۔ اس کے ساتھ ہی منگل کے روز دو اور لوگوں کی کورونا وائرس سے موت کے سبب اب تک مرنے والوں کی تعداد 29تک جا پہنچی۔ 331افراد صحت یاب ہوچکے ہیں اور باقی مختلف اضلاع میں قائم کووڈ اسپتالوں میں زیر علاج ہیں۔ داونگیرے ضلع میں مسلسل دوسرے دن زیادہ کیسوں کی نشاندہی ہوئی ہے۔ منگل کے روز اس ضلع میں 12نئے معاملے سامنے آئے۔ بنگلورو سے 3نئے معاملے سامنے آئے۔شہر میں اب تک گرین زون کہلانے والے شیواجی نگر کے ایک فرد میں کورونا وائرس کی تصدیق کے ساتھ ہی اب یہ اندیشہ پھیل گیا ہے کہ کورونا شہر کے دیگر علاقوں کو بھی اپنی لپیٹ میں لے سکتا ہے۔ 

ہاویری ضلع جو کورونا وائرس کی شروعات سے لے کر اب متاثر نہیں ہوا تھا منگل کے روز پہلی بار اس ضلع میں 2کیس سامنے آگئے ہیں اسی طرح ریاست کا سرحدی ضلع چامراج نگر جہاں کورونا وائرس کا ایک بھی معاملہ سامنے نہیں آیا تھا منگل کے روز وہاں ایک پولیس کانسٹیبل میں کورونا وائرس کی تصدیق کے سبب یہاں کے عوام دہشت زدہ ہیں۔

 داونگیرے میں اتوار کی شام 21لوگوں میں کورونا وائرس کی تصدیق کے بعد گزشتہ ہفتہ تک گرین زمرے میں آنے والے اس ضلع میں متاثرین کی تعداد بڑھ کر 44تک پہنچ گئی، باگلکوٹ میں 2نئے معاملے آئے بلاری میں ایک، دکشن کنڑا ضلع میں ایک بھٹکل میں ایک اور دھارواڑ میں ایک معاملہ سامنے آیا ہے۔ وجئے پور میں ایک 62سالہ خاتون کی موت ہوگئی۔ داونگیرے میں اتوار کے روز کورونا وائرس کے سبب داخل ہونے والی ایک 50سالہ خاتون کی موت ہوگئی۔ 

ریاست میں اب تک متاثرین کے بجزشبہ کی بنیاد پر  1130افراد کو الگ تھلگ رکھا گیا ہے اور ان کی صحت کی مسلسل نگرانی کی جارہی ہے۔