نئی دہلی، 26؍ستمبر(ایس او نیوز؍ایجنسی)بہار کے وزیر اعلیٰ نتیش کمار اور آر جے ڈی سربراہ لالو یادو نے اتوار کو کانگریس صدر سونیا گاندھی سے ان کی رہائش گاہ پر ملاقات کی- یہ ملاقات تقریباً ایک گھنٹے تک جاری رہی- میٹنگ کے بعد نتیش کمار نے کہا کہ ہم ملک کی کئی پارٹیوں کو متحد کرنا چاہتے ہیں -

سونیا گاندھی نے17اکتوبر کو کانگریس پارٹی کا نیا صدر منتخب ہونے کے بعد دوبارہ ملاقات کرنے کو کہا ہے-ساتھ ہی لالو نے کہا کہ ہمیں بی جے پی کو ہٹا کر ملک کو بچانا ہے- جس طرح ہم نے بہار میں بی جے پی کو ہٹایا، اسی طرح ہم سب کو اکٹھا ہونا ہے- لالو-تیش نے7سال بعد سونیا سے ملاقات کی- بہار میں 2015میں عظیم اتحاد کی حکومت کے قیام کے بعدنتیش نے پٹنہ کے گاندھی میدان میں وزیر اعلیٰ کے طور پر حلف لیا، جس میں سونیا نے بھی شرکت کی-

اس سے پہلے اتوار کو سابق نائب وزیر اعظم چودھری دیوی لال کے109ویں یوم پیدائش پر ہریانہ کے فتح آباد میں ”سمن دیوس ریلی“کا انعقاد کیا گیا-انڈین نیشنل لوک دل(آئی این ایل ڈی)کے سربراہ اوم پرکاش چوٹالہ نے نتیش کمار سمیت 10ریاستوں کے17لیڈروں کو ریلی کے لیے مدعو کیا تھا، لیکن اسٹیج پر صرف5بڑے لیڈر ہی نظر آئے- ان میں نتیش کمار، تیجسوی یادو، این سی پی سربراہ شرد پوار، ایس اے ڈی لیڈر سکھبیر سنگھ بادل اور سی پی آئی(ایم)کے جنرل سکریٹری سیتارام یچوری شامل تھے-

ریلی میں نتیش کمار نے کانگریس سمیت تمام پارٹیوں سے ایک ساتھ آنے کی اپیل کی- نتیش نے کہا کہ ایسا ہونے کے بعد بی جے پی کو2024کے لوک سبھا انتخابات میں کراری شکست ہوگی- ساتھ ہی تیجسوی نے بی جے پی کو نشانہ بناتے ہوئے پوچھا کہ اب این ڈی اے کہاں ہے؟ شیوسینا، اکالی دل، جے ڈی یو جیسی بی جے پی اتحادیوں نے جمہوریت کو بچانے کے لیے اسے چھوڑ دیا ہے-

سکھبیر سنگھ بادل نے کہا کہ اب وقت آگیا ہے کہ ایک ساتھ مل کر نیا اتحاد بنایا جائے- بادل نے مزید کہا کہ ایس اے ڈی، شیو سینا اور جے ڈی یو ہی حقیقی این ڈی اے ہیں، کیونکہ ہم نے اس کی بنیاد رکھی تھی- ساتھ ہی شرد پوار نے کہا کہ اب2024میں حکومت بدلنے کا وقت آ گیا ہے-نتیش نے اس ماہ ہریانہ کے سابق وزیر اعلیٰ اوم پرکاش چوٹالہ سے ملاقات کی تھی، جو ٹیچر بھرتی گھوٹالہ میں سزا کاٹ کر جیل سے باہر آئے تھے- چوٹالہ کی پارٹی آئی این ایل ڈی ہریانہ میں ایک علاقائی پارٹی ہے جس کے پاس10لوک سبھا سیٹیں ہیں - چوٹالہ کا شمار بڑے جاٹ لیڈروں میں ہوتا ہے-

ہریانہ کے ساتھ ساتھ مغربی یوپی میں 5سے زیادہ سیٹوں پر جاٹ ووٹروں کا اثر ہے-نتیش کمار نے اس ماہ دہلی کے دورے کے دوران راہول گاندھی سے پہلی ملاقات کی تھی- کانگریس اس وقت لوک سبھا میں سب سے بڑی پارٹی ہے- 2019میں کانگریس نے 52سیٹوں پر کامیابی حاصل کی، جب کہ پارٹی210سیٹوں پر دوسرے نمبر پر رہی- یعنی کل262سیٹیں ایسی ہیں جہاں کانگریس کا براہ راست مقابلہ بی جے پی سے تھا-