ممبئی،یکم اگست (ایس او نیوز/ایجنسی)  مہاراشٹر کے تھانے ضلع کے شاہ پور میں زیر تعمیر ہائی وے پر اندوہناک حادثہ پیش آیا۔ یہاں فلائی اوور بنانے کے لیے استعمال ہونے والی کرین نیچے کام کرنے والے مزدوروں پر گر گئی۔ اس حادثے میں 16 افراد ہلاک جبکہ 3 زخمی ہو گئے۔ معلومات کے مطابق یہ واقعہ رات 12 بجے کے قریب پیش آیا۔ این ڈی آر ایف کی دو ٹیمیں اس مقام پر کام کر رہی ہیں۔ اب تک 16 لاشیں نکالی جا چکی ہیں۔ منہدم ڈھانچے میں مزید 6 افراد کے پھنسے ہونے کا خدشہ ہے۔

پولیس نے بتایا کہ مہاراشٹرا کے تھانے ضلع میں منگل کو سمریدھی ایکسپریس وے کے تیسرے مرحلے کی تعمیر کے دوران ایک گرڈر مشین گر گئی۔ یہ مشین ایک خاص مقصد کی موبائل گینٹری کرین ہے، جسے پل کی تعمیر میں استعمال کیا جاتا ہے۔ یہ ہائی وے اور تیز رفتار ریل پل کی تعمیر کے منصوبوں میں پری کاسٹ باکس گرڈرز لگانے کے لیے استعمال ہوتی ہے۔ ایک عہدیدار نے بتایا کہ یہ حادثہ منگل کی صبح شاہ پور تحصیل کے سرالمبے گاؤں کے قریب پیش آیا۔

عہدیدار نے بتایا کہ پولیس اور فائر بریگیڈ کے اہلکار مقامی اداروں کے ساتھ مل کر ریسکیو آپریشن میں مصروف ہیں۔ اہلکار نے کہا کہ ہلاکتوں میں اضافے کا خدشہ ہے۔ سمردھی مہامرگ، جسے ہندو ہردئے سمراٹ بالاصاحب ٹھاکرے مہاراشٹرا سمردھی مہامرگ کے نام سے منسوب کیا گیا ہے، ممبئی اور ناگپور کو جوڑنے والا 701 کلومیٹر طویل ایکسپریس وے ہے۔ یہ دس اضلاع سے گزرتا ہے جن میں ناگپور، واشیم، وردھا، احمد نگر، بلدھانا، اورنگ آباد، امراوتی، جالنا، ناسک اور تھانے شامل ہیں۔

سمردھی مہامرگ کی تعمیر کا کام مہاراشٹر اسٹیٹ روڈ ڈیولپمنٹ کارپوریشن کر رہا ہے۔ ناگپور کو مندر کے شہر شرڈی سے جوڑنے والے پہلے مرحلے کا افتتاح وزیر اعظم نریندر مودی نے دسمبر 2022 میں کیا تھا۔ یہ 520 کلومیٹر کا فاصلہ طے کرتا ہے۔ وزیر اعلیٰ ایکناتھ شندے نے مئی میں کہا تھا کہ تیسرا اور آخری مرحلہ اس سال دسمبر کے آخر تک مکمل ہو جائے گا۔