بنگلورو،31؍مئی (ایس او نیوز) کرناٹک میں کورونا وائرس سے متاثر ہونے والی ایک اور خاتون کی موت کے ساتھ ریاست میں اب تک اس وائرس سے مرنے والوں کی تعداد 49 تک پہنچ چکی ہے۔ جبکہ 141 نئے متاثرین کی نشاندہی کے ساتھ کرناٹک میں جملہ متاثرین کی تعداد 2922 تک پہنچ گئی ہے۔

ریاست کے مختلف اضلاع سے جو 141 کیس سامنے آئے ان میں سے 90 ؍ افراد ایسے ہیں جو دیگر ریاستوں سے کرناٹک لوٹے ہیں۔ بنگلورو اربن میں سب سے زیادہ 33 معاملے سامنے آئے ۔ اس کے علاوہ یادیگر سے 18، دکشن کنڑا سے 14، اُڈپی سے 13، ہاسن سے 13 ، وجئے پور سے 11، شیموگہ سے 6، کلبرگی سے 2 ، بیلگاوی سے 1، داونگیرے سے 4، بیدر سے 10 ، میسورو سے 2، اُتر کنڑا سے 2 دھارواڑ سے 2 ، چترادرگہ سے 1، ٹمکوروسے 1، کولار سے 3، بنگلورو رورل سے 1، ہاویری سے 4 کیس سامنے آئے ہیں۔ بنگلورو میں 20 کیس ایسے ہیں جو ایک ہی خاندان سے متعلق ہیں۔ بیدر میں ایک 47 سالہ خاتون کی موت ہوگئی۔ اسے سانس لینے میں تکلیف کے سبب ضلع اسپتال میں داخل کروایا گیا جہاں وہ کورونا وائرس سے متاثر پائی گئی ۔

ہفتہ کے روز کورونا وائرس سے صحت یاب ہو کر اسپتال سے 103 افراد رخصت ہوئے ۔ ان میں بنگلورو کے فریزر ٹاؤن پولیس تھانے سے جڑا ٹرافک پولیس کانسٹیبل بھی شامل ہے۔ کلبرگی سے 43 ، بنگلورو سے 23 ، داونگیرے سے 20، کولار سے 5، باگل کوٹ سے 3، بیدر سے 3 افراد صحت یاب ہوکر آئیسولیشن سینٹرسے رخصت ہوئے۔ریاست میں مزید 1874 افراد اسپتالوں میں زیر علاج ہیں، ان میں سے 15 افراد کی حالت نازک ہے اور وہ آئی سی یو میں ہیں۔ ریاست بھر میں اب تک 2.80 لاکھ افراد کا کووڈ ٹیسٹ کیا گیا ہے جن میں سے 2922 متاثر پائے گئے ہیں۔ اس طرح آبادی کے تناسب سے جانچ کی بنیاد پر جو اوسط بنا ہے وہ ایک فیصد سے تھوڑا زیادہ کا ہے۔