نئی دہلی، 16 جولائی(ایس او نیوز/آئی این ایس انڈیا)مرکزی وزیر داخلہ جی کشن ریڈی نے منگل کو کہا کہ آسام میں قائم ٹربیونل نے اس سال مارچ تک کل 1.17 لاکھ لوگوں کو غیر ملکی قرار دیا۔ریڈی نے کہا کہ فی الحال 100 غیر ملکی (شہری) اتھارٹی آسام کے مختلف اضلاع میں چل رہے ہیں۔ انہوں نے لوک سبھا میں ایک سوال کے تحریری جواب میں کہاکہ 31 مارچ 2019 تک کل 1,17,164لوگوں کوٹربیونل نے غیر ملکی قرار دیا۔سپریم کورٹ کے 17 دسمبر 2014 کے ایک حکم کے مطابق گوہاٹی ہائی کورٹ کی ایک مخصوص بنچ ان ٹربیونل کے کام کاج کی باقاعدہ نگرانی کر رہی ہے۔ریڈی نے کہا کہ ان ٹربیونل کے خیالات سے مطمئن نہ ہونے والا کوئی بھی شخص ہائی کورٹ کا رخ کر سکتا ہے۔