ಹೊಸದಿಲ್ಲಿ: ಪ್ರಧಾನಿ ನರೇಂದ್ರ ಮೋದಿಯವರ ಅಧಿಕೃತ ಅಮೆರಿಕ ಪ್ರವಾಸದ ಬೆನ್ನಲ್ಲೇ ಬೈಡನ್ ಆಡಳಿತದ ಮಾನವಹಕ್ಕುಗಳ ಇಲಾಖೆಯ ಅತ್ಯುನ್ನತ ಅಧಿಕಾರಿಯೊಬ್ಬರು ಶನಿವಾರ ರಾತ್ರಿ ಭಾರತಕ್ಕೆ ಆಗಮಿಸಿದ್ದಾರೆ. ಅಮೆರಿಕದ ನಾಗರಿಕ ಸುರಕ್ಷತೆ, ಪ್ರಜಾಪ್ರಭುತ್ವ ಹಾಗೂ ಮಾನವಹಕ್ಕುಗಳ ಅಧೀನ ಕಾರ್ಯದರ್ಶಿ ಉಝಾ ಝಯಾ ಭಾರತ ಸಂದರ್ಶಿಸಲಿರುವ ಅಮೆರಿಕದ ಉನ್ನತ ಅಧಿಕಾರಿಯಾಗಿದ್ದಾರೆ.

ಅವರು ಉನ್ನತ ಸರಕಾರಿ ಅಧಿಕಾರಿಗಳು ಹಾಗೂ ಮಾನವಹಕ್ಕು ಹೋರಾಟಗಾರರನ್ನು ಭೇಟಿಯಾಗಿ ಮಾತುಕತೆ ನಡೆಸಲಿದ್ದಾರೆ. ಟಿಬೆಟ್ ವಿಷಯಗಳ ಕುರಿತ ಅಮೆರಿಕದ ವಿಶೇಷ ಸಮನ್ವಯಾಧಿಕಾರಿಯೂ ಆಗಿರುವ ಉಝಾ ಝಯಾ, ಹೊಸದಿಲ್ಲಿಯಲ್ಲಿ ಬೌದ್ಧ ಧಾರ್ಮಿಕ ನಾಯಕ ದಲಾಯಿ ಲಾವಾ ಅವರನ್ನು ಕೂಡಾ ಭೇಟಿಯಾಗಲಿದ್ದಾರೆ.

ಝಿಯಾ ಜೊತೆಗೆ ದಕ್ಷಿಣ ಏಶ್ಯಕ್ಕಾಗಿನ ಅಮೆರಿಕದ ವಿಶೇಷ ಅಧಿಕಾರಿ ಡೊನಾಲ್ಡ್ಲು ಹಾಗೂ 'ಯುಎಸ್‌ ಎಮ್'ನ ಹಿರಿಯ ಅಧಿಕಾರಿಯೊಬ್ಬರು ಆಗಮಿಸಿದ್ದಾರೆ. ಮೋದಿಯವರ ಅಮೆರಿಕ ಪ್ರವಾಸದ ಬಳಿಕ ಆ ದೇಶದಿಂದ ಭಾರತಕ್ಕೆ ಭೇಟಿ ನೀಡುತ್ತಿರುವ ಮೊದಲ ಉನ್ನತ ಮಟ್ಟದ ನಿಯೋಗ ಇದಾಗಿದೆ. ಈ ವರ್ಷದ ಜೂನ್‌ನಲ್ಲಿ ಅಮೆರಿಕಕ್ಕೆ ಭೇಟಿ ನೀಡಿದ್ದ ಮೋದಿಯವರು ಅಮೆರಿಕದ ಅಧ್ಯಕ್ಷ ಬೈಡನ್ ಜೊತೆ ಮಾತುಕತೆ ನಡೆಸಿದ್ದರು. ಈ ಸಂದರ್ಭದಲ್ಲಿ ಉಭಯ ದೇಶಗಳ ನಡುವೆ ಹಲವಾರು ವ್ಯೂಹಾತ್ಮಕ ಒಪ್ಪಂದಗಳಿಗೆ ಸಹಿಹಾಕಲಾಗಿತ್ತು. ಆದರೆ ಇದೇ ವೇಳೆ, ಭಾರತದಲ್ಲಿನ ಪ್ರಜಾಪ್ರಭುತ್ವ ಹಾಗೂ ಮಾನವಹಕ್ಕುಗಳ ಪರಿಸ್ಥಿತಿ ಬಗ್ಗೆ ಅಮೆರಿಕದ ಹಲವಾರು ಸಂಸದರು, ಶಾಸನಸಭಾ ಪ್ರತಿನಿಧಿಗಳು ಆತಂಕ ವ್ಯಕ್ತಪಡಿಸಿದ್ದರು.