'ಮೈ ಲಾರ್ಡ್' ಎಂದು ಕರೆಯುವುದನ್ನು ನಿಲ್ಲಿಸಿ, ನಿಮಗೆ ನನ್ನ ಅರ್ಧ ವೇತನವನ್ನು ನೀಡುತ್ತೇನೆ; ಸುಪ್ರೀಂ ನ್ಯಾಯಾಧೀಶ
ಹೊಸದಿಲ್ಲಿ: ನ್ಯಾಯಾಂಗ ಕಲಾಪಗಳ ಸಂದರ್ಭದಲ್ಲಿ 'ಮೈ ಲಾರ್ಡ್ ಮತ್ತು ಯುವರ್ ಲಾರ್ಡ್ ಶಿಪ್ಸ್' ಎಂದು ಪದೇ ಪದೇ ಸಂಬೋಧಿಸುವ ಬಗ್ಗೆ ಸರ್ವೋಚ್ಚ ನ್ಯಾಯಾಲಯದ ನ್ಯಾಯಾಧೀಶ ನ್ಯಾ.ಪಿ.ಎಸ್. ನರಸಿಂಹ ಅವರು ಅಸಮಾಧಾನವನ್ನು ವ್ಯಕ್ತಪಡಿಸಿದ್ದಾರೆ.
ಬುಧವಾರ ವಿಚಾರಣೆಯ ಸಂದರ್ಭದಲ್ಲಿ ನ್ಯಾ.ಎ.ಎಸ್.ಬೋಪಣ್ಣ ನೇತೃತ್ವದ ಪೀಠದಲ್ಲಿ ಆಸೀನರಾಗಿದ್ದ ನ್ಯಾ.ನರಸಿಂಹ ಅವರು “ನೀವು ಎಷ್ಟು ಸಲ 'ಮೈ ಲಾರ್ಡ್' ಎಂದು ಹೇಳುತ್ತೀರಿ? ನೀವು ಇದನ್ನು ನಿಲ್ಲಿಸಿದರೆ ನಾನು ನನ್ನ ವೇತನದಲ್ಲಿ ಅರ್ಧವನ್ನು ನಿಮಗೆ ಕೊಡುತ್ತೇನೆ” ಎಂದು ಹಿರಿಯ ವಕೀಲರೋರ್ವರನ್ನುದ್ದೇಶಿಸಿ ಹೇಳಿದರು.
ವಕೀಲರು ವಾದದ ಸಂದರ್ಭದಲ್ಲಿ ನ್ಯಾಯಾಧೀಶರನು ಮೈ ಲಾರ್ಡ್' ಅಥವಾ 'ಯುವರ್ ಲಾರ್ಡ್ ಶಿಪ್ಸ್ ಎಂದು ಸಂಬೋಧಿಸುತ್ತಾರೆ. ಈ ಪದ್ಧತಿಯ ವಿರೋಧಿಗಳು ಹೇಳುವಂತೆ ಇದು ವಸಾಹತುಶಾಹಿ ಯುಗದ ಪಳೆಯುಳಿಕೆಯಾಗಿದೆ ಮತ್ತು ಗುಲಾಮಗಿರಿಯ ಸಂಕೇತವಾಗಿದೆ.
ಇದರ ಬದಲಿಗೆ 'ಸರ್' ಎಂದು ನೀವೇಕೆ ಸಂಬೋಧಿಸಬಾರದು ಎಂದು ಪ್ರಶ್ನಿಸಿದ ನ್ಯಾ.ನರಸಿಂಹ, ಇಲ್ಲದಿದ್ದರೆ ಹಿರಿಯ ವಕೀಲರು ಎಷ್ಟು ಸಾರಿ 'ಮೈಲಾರ್ಡ್' ಎಂದು ಹೇಳಿದ್ದಾರೆ ಎಂದು ಎಣಿಸಲು ಆರಂಭಿಸುತ್ತೇನೆ ಎಂದರು. 2006ರಲ್ಲಿ ಬಾರ್ ಕೌನ್ಸಿಲ್ ಆಫ್ ಇಂಡಿಯಾ,ಯಾವುದೇ ವಕೀಲರು ನ್ಯಾಯಾಧೀಶರನ್ನು 'ಮೈ ಲಾರ್ಡ್' ಮತ್ತು 'ಯುವ ಲಾರ್ಡ್ಸ್ಟ್' ಎಂದು ಸಂಬೋಧಿಸಕೂಡದು ಎಂಬ ನಿರ್ಣಯವನ್ನು ಅಂಗೀಕರಿಸಿತ್ತು, ಆದರೆ ಆಚರಣೆಯಲ್ಲಿ ಅದನ್ನು ಅನುಸರಿಸಲಾಗುತ್ತಿಲ್ಲ.