ಹೊಸದಿಲ್ಲಿ: ಆಧುನಿಕ ಭಾರತ ಕಂಡಂತಹ ಅತಿ ದೊಡ್ಡ ಕಲ್ಲಿದ್ದಲು ಹಗರಣದ ಹಿಂದೆ ಅದಾನಿ ಉದ್ಯಮ ಸಮೂಹ ಇದೆಯೆಂದು ಕಾಂಗ್ರೆಸ್ ಶನಿವಾರ ಆಪಾದಿಸಿದೆ. ಕಳೆದ ಎರಡು ವರ್ಷಗಳಲ್ಲಿ ಕಲ್ಲಿದ್ದಲು ಮಾರಾಟದಿಂದ ಬಂದ ಲಾಭಾಂಶದಲ್ಲಿ 12 ಸಾವಿರ ಕೋಟಿ ರೂ. ಗೂ ಅಧಿಕ ಹಣವನ್ನು ದೇಶದಿಂದ ಹೊರಗೆ ವರ್ಗಾಯಿಸಲಾಗಿದೆ ಎಂಬುದನ್ನು ಹೊಸದಾಗಿ ಪ್ರಕಟವಾದ ಪತ್ರಿಕಾ ವರದಿಯೊಂದು ಬಹಿರಂಗ ಪಡಿಸಿರುವುದಾಗಿ ಅದು ಹೇಳಿದೆ. 2019 ಹಾಗೂ 2021ರ ನಡುವೆ ಅದಾನಿ ಕಂಪೆನಿಯು 31 ಲಕ್ಷ ಟನ್ ಕಲ್ಲಿದ್ದಲು ಸಾಗಾಟಗಳನ್ನು ನಡೆಸಿದೆ. ಕಲ್ಲಿದ್ದಲು ವ್ಯವಹಾರದಲ್ಲಿ ಲಾಭಾಂಶ ಕಡಿಮೆಯಿದ್ದರೂ, ಅದಾನಿ ಸಮೂಹವು ಗ್ರಾಹಕರಿಗೆ ದುಬಾರಿ ಬೆಲೆಗೆ ಮಾರಾಟ ಮಾಡುವ ಮೂಲಕ ಅದರಲ್ಲಿ ಶೇ.52ರಷ್ಟು ಲಾಭ ಮಾಡಿಕೊಂಡಿದೆ. ಎಂಬುದನ್ನು ಫೈನಾನ್ಶಿಯಲ್ ಟೈಮ್ಸ್‌ ನಲ್ಲಿ ಪ್ರಕಟವಾದ ವರದಿಯು ಬಹಿರಂಗಪಡಿಸಿದೆ ಎಂದು ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಜೈರಾಮ್ ರಮೇಶ್ ತಿಳಿಸಿದ್ದಾರೆ.

ಅದಾನಿ ಕಂಪೆನಿಯು ಕೋಟ್ಯಂತರ ಭಾರತೀಯರ ಜೇಬಿಗೆ ಕನ್ನ ಹಾಕಿದೆ ಎಂಬುದು ಉತ್ತೇಕ್ಷೆಯ ಮಾತಲ್ಲ, ಅಕ್ಷರಶಃ ಸತ್ಯ ಎಂದು ಅವರು ಹೇಳಿದರು.

ಆಸ್ತಿಗಳನ್ನು ಸಂಪಾದಿಸಲು ಅದಾನಿ ಗ್ರೂಪ್‌ಗೆ ಬಿಜೆಪಿ ಸರಕಾರವು ನೆರವಾಗುತ್ತಿದೆ. ಇದರಿಂದಾಗಿ ಬಿಜೆಪಿಗೆ ಚುನಾವಣಾ ಬಾಂಡ್‌ಗಳ ಪ್ರವಾಹವೇ ಹರಿದುಬರುತ್ತಿದ್ದು, ಅದಕ್ಕೆ ಇಷ್ಟಬಂದಂತೆ ಶಾಸಕರನ್ನು ಖರೀದಿಸಲು ಹಾಗೂ ಪ್ರತಿಪಕ್ಷಗಳನ್ನು ಒಡೆಯಲು ಸಾಧ್ಯವಾಗುತ್ತಿದೆ ಎಂದು ಜೈರಾಮ್ ರಮೇಶ್‌ ಆಪಾದಿಸಿದ್ದಾರೆ.

ಇದು ಭಾರತದ ಅತಿ ದೊಡ್ಡ ಹಗರಣವಾಗಿದೆ. ಭಾರತದ ಜನತೆಯ ಬಗ್ಗೆ ಇರುವ ಘೋರ ತಿರಸಾರದ ಜೊತೆ ದುರಾಸೆ ಹಾಗೂ
ಹೃದಯಹೀನತೆಯನ್ನು ಅದು ಹೊಂದಿದೆ ಎಂದು ಹೇಳಿಕೆಯು ತಿಳಿಸಿದೆ.

ನಿಭಾಯಿಸಲು ಸಾಧ್ಯವಾಗದ ಹಗರಣವೇ ಇಲ್ಲ ಹಾಗೂ ಗಮನವನ್ನು ಬೇರೆಡೆ ಸೆಳೆಯಲು ಸಾಧ್ಯವಾಗದ ಯಾವುದೇ ವಿಷಯವಿಲ್ಲವೆಂಬ ಭಾವನೆಯೊಂದಿಗೆ ಈ ಹಗರಣವನ್ನು ನಡೆಸಲಾಗಿದೆ.

ಆದರೆ ಶಾಹೆನ್‌ಶಾ ಅವರು ತಪ್ಪುಮಾಡಿದ್ದಾರೆ. ಭಾರತವನ್ನು ವಶಪಡಿಸಿಕೊಳ್ಳಲು ಮೊದಾನಿ'ಗೆ ಸಾಧ್ಯವಾಗದು. 2024ರಲ್ಲಿ ಭಾರತದ ಜನತೆ ಅವರಿಗೆ ತಕ್ಕ ಉತ್ತರ ನೀಡಲಿದ್ದಾರೆ ಎಂದು ರಮೇಶ್ ತಿಳಿಸಿದ್ದಾರೆ. ಆದರೆ ಫೈನಾನ್ಶಿಯಲ್ ಟೈಮ್ಸ್‌ನಲ್ಲಿ ಪ್ರಕಟವಾದ ವರದಿಯನ್ನು ಅದಾನಿ ಗ್ರೂಪ್ ಖಂಡಿಸಿದೆ. ಸಾರ್ವಜನಿಕವಾಗಿ ಲಭ್ಯವಿರುವ ವಾಸ್ತವಾಂಶಗಳು ಹಾಗೂ ಮಾಹಿತಿಯನ್ನು ವರದಿಯಲ್ಲಿ ತಿರುಚಲಾಗಿದೆ ಎಂದು ಅದು ಆರೋಪಿಸಿದೆ.