ಆನ್ಲೈನ್ ಗೇಮಿಂಗ್ಗೆ ಶೇ.28 ಜಿಎಸ್ಟಿ; ಅಕ್ಟೋಬರ್ 1ರಿಂದ ಜಾರಿ
ಹೊಸದಿಲ್ಲಿ: ಆನ್ಲೈನ್ ಗೇಮಿಂಗ್ಗಳಲ್ಲಿ ಹೊಡಲಾಗುವ ಬೆಟ್ಟಿಂಗ್ಗಳ ಮುಖಮೌಲ್ಯದ ಮೇಲೆ ಶೇ.28ರಷ್ಟು ಸರಕು ಹಾಗೂ ಸೇವಾ ತೆರಿಗೆ (ಜಿಎಸ್ಟಿ) ವಿಧಿಸಲು ಕೇಂದ್ರ ಸರಕಾರ ನಿರ್ಧರಿಸಿದ್ದು, ಅಕ್ಟೋಬರ್ 1ರಿಂದ ಜಾರಿಗೆ ಬರಲಿದೆಯೆಂದು ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಬುಧವಾರ ತಿಳಿಸಿದ್ದಾರೆ.
ಹೊಸದಿಲ್ಲಿಯಲ್ಲಿ ಜಿಎಸ್ಟಿ ಮಂಡಳಿ ಸಭೆಯಲ್ಲಿ ಪಾಲ್ಗೊಂಡ ಬಳಿಕ ಸುದ್ದಿಗಾರರ ಜೊತೆ ಮಾತನಾಡಿದ ಅವರು ಈ ವಿಷಯ ತಿಳಿಸಿದರು.
ಎಲ್ಲಾ ರೀತಿಯ ಬೆಟ್ಟಿಂಗ್ ಹಾಗೂ ವೀಡಿಯೊ ಸಂಬಂಧಿತ ಚಟುವಟಿಕೆಗಳು,ಕ್ಯಾಸಿನೊಗಳು ಹಾಗೂ ಕುದುರೆ ರೇಸಿಂಗ್ ಮೇಲೆ ತೆರಿಗೆಯನ್ನು ವಿಧಿಸುವ ನಿರ್ಧಾರವನ್ನು ಕಳೆದ ಜಿಎಸ್ಟಿ ಸಭೆಯಲ್ಲಿ ಕೈಗೊಳ್ಳಲಾಗಿತ್ತೆಂದು ಅವರು ತಿಳಿಸಿದರು. ಜಿಎಸ್ಟಿ ಕಾನೂನಿನಲ್ಲಿ ಯಾವೆಲ್ಲಾ ತಿದ್ದುಪಡಿಗಳನ್ನು ಮಾಡಬಹುದೆಂಬ ನಿರ್ದಿಷ್ಟ ಕಾರ್ಯಸೂಚಿಯನ್ನು ಇಂದಿನ ಸಭೆಯು ಹೊಂದಿತ್ತು ಎಂದರವರು ಹೇಳಿದರು.
ಆನ್ಲೈನ್ ಗೇಮಿಂಗ್ ಮೇಲೆ ಶೇ.28ರಷ್ಟು ಜಿಎಸ್ಟಿ ಹೇರಿಕೆ ಬಗ್ಗೆ ವಿವಿಧ ರಾಜ್ಯಗಳ ಸಚಿವರು ಕಳವಳ ವ್ಯಕ್ತಪಡಿಸಿರುವ ಹೊರತಾಗಿಯೂ ಅಕ್ಟೋಬರ್ 1ರಿಂದ ನೂತನ ತೆರಿಗೆ ಜಾರಿಗೆ ಬರಲಿದೆ ಎಂದರು.
ಆನ್ಲೈನ್ ಗೇಮಿಂಗ್ಗೆ ಜಿಎಸ್ಟಿ ಹೇರಿಕೆಯನ್ನು ಮರುಪರಾಮರ್ಶಿಸಬೇಕು ಹಾಗೂ ಆ ವಿಷಯವನ್ನು ಸಚಿವ ಸಮಿತಿಗೆ ಕಳುಹಿಸಿಕೊಡಬೇಕೆಂದು ದಿಲ್ಲಿಯ ಸಚಿವರು ಸಭೆಯಲ್ಲಿ ಆಗ್ರಹಿಸಿದ್ದರು. ಗೋವಾ ಹಾಗೂ ಸಿಕ್ಕಿಂ ರಾಜ್ಯಗಳು ಕ್ಯಾಸಿನೊಗಳಲ್ಲಿ ಹಿತಾಸಕ್ತಿಗಳನ್ನು ಹೊಂದಿವೆ. ಶೇ.28ರಷ್ಟು ಅಧಿಕ ಜಿಎಸ್ಟಿ ಹೇರಿಕೆಯು ಸಣ್ಣ ರಾಜ್ಯಗಳಾದ ತಮ್ಮ ಆರ್ಥಿಕ ಹಿತಾಕ್ತಿಗಳಿಗೆ ಧಕ್ಕೆಯುಂಟು ಮಾಡಲಿದೆಯೆಂದು ಆ ರಾಜ್ಯಗಳ ಸಚಿವರು ಆತಂಕ ವ್ಯಕ್ತಪಡಿಸಿರುವುದಾಗಿ ಸೀತಾರಾಮನ್ ಹೇಳಿದರು.
ಆದರೆ ನೂತನ ಜಿಎಸ್ಟಿ ತೆರಿಗೆ ಜಾರಿಯಾದ ಆರು ತಿಂಗಳುಗಳ ಬಳಿಕ ಮರುಪರಾಮರ್ಶೆ ಮಾಡುವುದಾಗಿ ಮಂಡಳಿಯು ಈ ರಾಜ್ಯಗಳಿಗೆ ಭರವಸೆ ನೀಡಿತೆಂದು ಸೀತಾರಾಮನ್ ತಿಳಿಸಿದರು.