ಇಂಫಾಲ: ಮಣಿಪುರದ ಇಂಫಾಲ ಪೂರ್ವದ ಹೈಂಗಾಗ್ನಲ್ಲಿರುವ ರಾಜ್ಯದ ಮುಖ್ಯಮಂತ್ರಿ ಎನ್ ಬಿರೆನ್ ಸಿಂಗ್ ಅವರ ಖಾಸಗಿ ನಿವಾಸಕ್ಕೆ ನೂರಾರು ಜನರಿದ್ದ ಗುಂಪೊಂದು ಗುರುವಾರ ರಾತ್ರಿ ದಾಳಿ ನಡೆಸಲು ಪ್ರಯತ್ನಿಸಿದೆ. ಆದರೆ, ಆ ಗುಂಪನ್ನು ಸುಮಾರು 100ರಿಂದ 150 ಮೀಟ ಅಂತರದಲ್ಲಿ ತಡೆಯುವಲ್ಲಿ ಭದ್ರತಾ ಪಡೆ ಯಶಸ್ವಿಯಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಘಟನೆಯ ಸಂದರ್ಭ ನಿವಾಸದಲ್ಲಿ ಯಾರೂ ಇರಲಿಲ್ಲ. ಸಿಂಗ್ ಇಂಫಾಲದ ಹೃದಯ ಭಾಗದಲ್ಲಿ ಅತ್ಯುತ್ತಮ ಭದ್ರತೆ ಇರುವ ಅಧಿಕೃತ ಬಂಗ್ಲೆಯಲ್ಲಿ ಪ್ರತ್ಯೇಕವಾಗಿ ವಾಸಿಸುತ್ತಿದ್ದಾರೆ. ಎರಡು ಗುಂಪಿನ ಜನರು ವಿಭಿನ್ನ ದಿಕ್ಕಿನಿಂದ ಸಿಂಗ್ ಅವರ ಪೂರ್ವಜರ ನಿವಾಸವನ್ನು ಸಮೀಪಿಸಿದರು. ಆದರೆ, ಅವರಿಗೆ ಭದ್ರತಾ ಪಡೆ ತಡೆ ಒಡ್ಡಿತು. ಗುಂಪನ್ನು ಚದುರಿಸಲು ಕ್ಷಿಪ್ರ ಕಾರ್ಯ ಪಡೆ ಹಾಗೂ ರಾಜ್ಯ ಪೊಲೀಸ್ ಸಿಬ್ಬಂದಿ ಹಲವು ಸುತ್ತು ಅಶ್ರುವಾಯು ಸೆಲ್ಗಳನ್ನು ಸಿಡಿಸಿದರು ಎಂದು ಪೊಲೀಸ್ ಅಧಿಕಾರಿ ತಿಳಿಸಿದ್ದಾರೆ.
ಪ್ರತಿಭಟನಾಕಾರರು ಇಂಫಾಲದಲ್ಲಿರುವ ರಾಜ್ಯ ಬಿಜೆಪಿ ಅಧ್ಯಕ್ಷೆ ಅಧಿಕಾರಿಮಾಯುನ್ ಶಾರದಾ ದೇವಿ ಹಾಗೂ ಬಿಜೆಪಿ ಶಾಸಕ ಸೋರೈಸಮ್ ಕೆಬಿ ಅವರ ನಿವಾಸಗಳಿಗೆ ಕೂಡ ಮುತ್ತಿಗೆ ಹಾಕಲು ನಿರ್ಧರಿಸಿದ್ದರು ಎಂದು ಅವರು ಹೇಳಿದ್ದಾರೆ.