ಹೊನ್ನಾವರ: ತಾಲೂಕಿನ ಹೆಬ್ಬಾರ್ನಕೆರೆಯ ಬಾಲಚಂದ್ರ ಗಣಪತಿ ಹೆಗಡೆಯವರ ಮನೆಯಲ್ಲಿ ಕಳ್ಳರು ಕೈಚಳಕ ತೋರಿದ್ದಾರೆ. ಬಾಲಚಂದ್ರ ಹೆಗಡೆಯವರ ಪತ್ನಿ ಚಂದ್ರಕಲಾ ಶಿಕ್ಷಕಿಯಾಗಿದ್ದು, ಇವರಿಗೆ ಅನಾರೋಗ್ಯದ ಹಿನ್ನಲೆಯಲ್ಲಿ ಮಣಿಪಾಲ ಆಸ್ಪತ್ರೆಗೆ ಪತಿ ಬಾಲಚಂದ್ರ ಹೆಗಡೆಯವರು ಕರೆದುಕೊಂಡು ಹೋಗಿದ್ದರು. ಮನೆಯಲ್ಲಿ ಹಿರಿಯರು ಇಲ್ಲದ ಕಾರಣ ಹುಡುಗಿಯರಾದ ಅಶ್ವಿನಿ ಮತ್ತು ದಿವ್ಯಾ, ಅಜ್ಜಿ ಮನೆಗೆ ತೆರಳಿದ್ದರು. ಬಾಲಚಂದ್ರ ಹೆಗಡೆಯವರ ಮನೆಯವರು ಯಾರೂ ಇಲ್ಲದ ಸಮಯ ನೋಡಿ ಕಳ್ಳರು ದೇವರ ಕೋಣೆಯ ಕಿಟಕಿ ಮುರಿದು, ಒಳಹೊಕ್ಕಿ ಕಪಾಟಿನ ಬೀಗ ಮುರಿದು ಬಂಗಾರ ದೋಚಿದ್ದಾರೆ. ಪ್ರಕರಣ ಹೊನ್ನಾವರ ಪೊಲೀಸ ಠಾಣೆಯಲ್ಲಿ ದಾಖಲಾಗಿದ್ದು, ಕಾರವಾರದಿಂದ ಬೆರಳಚ್ಚು ತಜ್ಞರು, ಶ್ವಾನ ದಳದವರು ಆಗಮಿಸಿ ಸ್ಥಳ ಪರಿಶೀಲನೆ ನಡೆಸಿ ತನಿಖೆ ಮುಂದುವರಿಸಿದ್ದಾರೆ.