ಭಟ್ಕಳ: ಹವಾಮಾನ ವೈಫರೀತ್ಯದ ಸಂಕಟ ಮುಗಿಸಿ ಕಳೆದ 3-4 ದಿನಗಳಿಂದ ತಾಲೂಕಿನ ಬೋಟುಗಳು ಮೀನುಗಾರಿಕೆಯಲ್ಲಿ ತೊಡಗಿದ್ದು, ಮೀನುಗಾರರಲ್ಲಿ ಆಶಾಭಾವನೆ ಚಿಗುರೊಡೆದಿದೆ. ಬುಧವಾರ 3 ಮೀನುಗಾರಿಕಾ ಬೋಟುಗಳು ಟನ್‍ಗಟ್ಟಲೆ ರೇ ಫಿಶ್‍ಗಳನ್ನು ಹೊತ್ತು ತಂದಿದ್ದು, ಜನರಲ್ಲಿ ಕುತೂಹಲ ಮೂಡಿಸಿತು.

ಪ್ರಭಾಕರ ಖಾರ್ವಿ ಒಡೆತನದ ರಾಜಶ್ರೀ ಬೋಟಿಗೆ 700 ಕೆಜಿಗೂ ಅಧಿಕ ತೂಕದ ಒಂದು ರೇ ಫಿಶ್ ಸಿಕ್ಕಿದ್ದರೆ, ಸುಧಾಕರ ಖಾರ್ವಿ ಒಡೆತನದ ರಾಧಾಕೃಷ್ಣ ಹೆಸರಿನ ಬೋಟಿಗೆ ಸರಿಸುಮಾರು 500ಕೆಜಿಗೂ ಅಧಿಕ ತೂಕದ 12 ಹಾಗೂ ಕೇಶವ ಮೊಗೇರ ಮಾಲಕತ್ವದ ಜಯದುರ್ಗಾ ಹೆಸರಿನ ಬೋಟಿಗೆ ಸರಿಸುಮಾರು 500 ಕೆಜಿಗೂ ಅಧಿಕ ತೂಕದ 11 ರೇ ಫಿಶ್ ಸಿಕ್ಕಿದೆ. ಈ ಮೀನುಗಳು ಭಾರೀ ಗಾತ್ರ ಹಾಗೂ ತೂಕವನ್ನು ಹೊಂದಿರುವ ಕಾರಣ ಬೋಟಿನಿಂದ ಈ ಮೀನುಗಳನ್ನು ದಡಕ್ಕೆ ತರಲು ಕ್ರೇನ್‍ನ್ನು ತರಿಸಿಕೊಳ್ಳಲಾಯಿತು.

ಸ್ಥಳೀಯ ಮೀನುಗಾರರು ಹಾಗೂ ಸಾರ್ವಜನಿಕರು ರೇ ಫಿಶ್‍ಗಳನ್ನು ನೋಡಲು ದಡದಲ್ಲಿ ಮುಗಿ ಬಿದ್ದಿರುವುದು ಕಂಡು ಬಂತು. ಇತ್ತೀಚಿಗೆ ಮಲ್ಪೆಯಲ್ಲಿ 700ಕೆಜಿ ತೂಕದ ರೇ ಫಿಶ್ ಬೋಟಿಲ ಬಲೆಗೆ ಬಿದ್ದು ಸುದ್ದಿಯಾಗಿದ್ದನ್ನಿಲ್ಲಿ ಸ್ಮರಿಸಿಕೊಳ್ಳಬಹುದು.