ಮಹಿಳಾ ಮೀಸಲಾತಿ ಮಸೂದೆಯ ಕರಡು ರಚನೆ ಮತ್ತು ಅದನ್ನು ಸ೦ಸತ್ ನಲ್ಲಿ ಮಂಡಿಸುವ ವಿಚಾರದಲ್ಲಿ ರಹಸ್ಯ ಕಾಯ್ದುಕೊಂಡಿರುವುದಕ್ಕೆ ಡಿಎಮ್ ಕೆ ಸಂಸದೆ ಕನಿಮೋಳಿ ಬುಧವಾರ ಕೇಂದ್ರ ಸರಕಾರವನ್ನು ಟೀಕಿಸಿದ್ದಾರೆ.
ಅದೇ ವೇಳೆ, ಸರಕಾರ ಮತ್ತು ಸಮಾಜ “ಮಹಿಳೆಯರಿಗೆ ಸಲಾಮು ಹೊಡೆಯುವುದನ್ನು ಮತ್ತು ಅವರನ್ನು ಪೂಜಿಸುವುದನ್ನು ನಿಲ್ಲಿಸಬೇಕು, ಬದಲಿಗೆ ಅವರನ್ನು ಸಮಾನವಾಗಿ ನಡೆಯಲು ಬಿಡಬೇಕು'' ಎಂದು ಅವರು ಹೇಳಿದರು. “ನೀವು ಮಹಿಳೆಯರನ್ನು ತಾಯಿ, ಸಹೋದರಿ ಅಥವಾ ಹೆಂಡತಿ ಎಂದು ಕರೆಯುವುದು ಬೇಕಾಗಿಲ್ಲ. ಸಮಾನರಂತೆ ಕಂಡರೆ ಸಾಕು'' ಎಂದು ಲೋಕಸಭೆಯಲ್ಲಿ ಮಾತನಾಡಿದ ಅವರು ನುಡಿದರು.
ಈ ಮಸೂದೆಯನ್ನು ಮಂಡಿಸುವ ಮೊದಲು ಸಂಬಂಧಪಟ್ಟವರೊಂದಿಗೆ ಚರ್ಚಿಸಿದ್ದೀರಾ ಎಂದು ಅವರು ಸರಕಾರವನ್ನು ಪ್ರಶ್ನಿಸಿದರು.
“ಮಹಿಳಾ ಮೀಸಲಾತಿ ಮಸೂದೆಯ ಬಗ್ಗೆ ಸಂಸತ್ನಲ್ಲಿ ನಾನು ಹಲವು ಬಾರಿ ಪ್ರಶ್ನೆಗಳನ್ನು ಕೇಳಿದ್ದೇನೆ. ಅದಕ್ಕೆ ಸರಕಾರ ಒಂದೇ ರೀತಿಯ ಉತ್ತರಗಳನ್ನು ನೀಡುತ್ತಾ ಬಂದಿದೆ. ಎಲ್ಲಾ ಸಂಬಂಧಪಟ್ಟವರು ಮತ್ತು ರಾಜಕೀಯ ಪಕ್ಷಗಳನ್ನು ಇದರಲ್ಲಿ ತೊಡಗಿಸಬೇಕಾಗಿದೆ ಮತ್ತು ಮಸೂದೆಯನ್ನು ತರುವ ಮೊದಲು ಒಮ್ಮತವನ್ನು ಸೃಷ್ಟಿಸಬೇಕಾಗಿದೆ' ಎಂದು ಅವರು ಹೇಳುತ್ತಿದ್ದರು ಎಂದು ಕನಿಮೋಳಿ ಹೇಳಿದರು.