ಭಟ್ಕಳ: ಖಾಸಗಿ ಶಾಲೆಗಳ ಹಾವಳಿಯಿಂದಾಗಿ ಇತ್ತಿಚೆಗೆ ಸರ್ಕಾರಿ ಶಾಲೆಗಳಲ್ಲಿ ವಿದ್ಯಾರ್ಥಿಗಳ ಸಂಖ್ಯೆ ಗಣನೀಯ ಪ್ರಮಾಣದಲ್ಲಿ ಕ್ಷೀಣಿಸುತ್ತಿದ್ದು ಕೆಲ ಸರ್ಕಾರಿ ಶಾಲಾ ಕಟ್ಟಡಗಳು ವಿದ್ಯಾರ್ಥಿಗಳ ಹಾಜರಾತಿ ಪ್ರಮಾಣ ಕುಸಿತದಿಂದಾಗಿ ಮುಚ್ಚಲ್ಪಟ್ಟಿವೆ. ಇಂತಹ ಮುಚ್ಚಲ್ಪಟ್ಟ ಸರ್ಕಾರಿ ಶಾಲಾ ಕಟ್ಟಡಗಳೀಗ ಅಲೆಮಾರಿಗಳ ವಾಸಸ್ಥಾನವಾಗಿ ಮಾರ್ಪಟ್ಟಿವೆ.
ಭಟ್ಕಳ ತಾಲೂಕಿನ ಸುಮಾರು 150ಕ್ಕೂ ಹೆಚ್ಚು ಸರ್ಕಾರಿ ಪ್ರಾಥಮಿಕ ಶಾಲೆಗಳ ಪೈಕಿ ಆರು ಶಾಲೆಗಳು ಸಂಪೂರ್ಣವಾಗಿ ಸ್ಥಗಿತಗೊಂಡಿದ್ದು ಕೆಲವು ಬೇರೆಕಟ್ಟಡಗಳಿಗೆ ಸ್ಥಳಾಂತಗೊಂಡಿವೆ. ಇಂತಹ ಕಟ್ಟಡಗಳ ಪೈಕಿ ಸರ್ಕಾರಿ ಕಿರಿಯ ಪ್ರಾಥಮಿಕ ಶಾಲೆ ಗುಂಡ್ಲುಕಟ್ಟಾ, ಅಂತ್ರೋಳ್ಳಿ, ನಸ್ತಾರ ಹಾಗು ಕವೂರು ಶಾಲೆಗಳಾಗಿದ್ದರೆ. ಕೋಣಾರ ಗಾಳಿಕಟ್ಟಾ, ಬೆಟ್ಕೂರು ಶಾಲೆಗಳು ಖಾಸಗಿಯವರ ಜಾಗದಲ್ಲಿವೆ. ಈ ಆರು ಶಾಲೆಗಳು ಈಗ ಶಾಲೆಗಳಾಗಿ ಉಳಿಯದೆ ಜೂಜುಕೂರರ, ಕುಡುಕರ, ವೇಶ್ಯವಾಟಿಕೆಗಳ ಕೇಂದ್ರಗಳಾಗಿ ಮಾರ್ಪಟ್ಟಿವೆ ಎನ್ನುವುದು ಸಾರ್ವಜನಿಕರ ಆರೋಪವಾಗಿದ್ದು ಇದಕ್ಕೆ ಕೂಡಲೇ ಕಾಯಕಲ್ಪವನ್ನು ನೀಡಿ ಸರ್ಕಾರದ ಬೇರೆ ಬೇರೆ ಉದ್ದೇಶಗಳಿಗೆ ಬಳಸಿಕೊಳ್ಳಬೇಕೆಂಬ ಮಾತುಗಳು ಸಾರ್ವಜನಿಕ ವಲಯಗಳಲ್ಲಿ ಕೇಳಿ ಬರುತ್ತಿವೆ.
ಈ ಕುರಿತಂತೆ ಮಾಧ್ಯಮಗಳಿಗೆ ಪ್ರತಿಕ್ರಿಯಿಸಿದ ಕ್ಷೇತ್ರ ಶಿಕ್ಷಣಾಧಿಕಾರಿ ಎಂ.ಆರ್.ಮುಂಜಿ “ಸಪರ್ಮಕ ವಿದ್ಯಾರ್ಥಿಗಳ ಸಂಖ್ಯೆ ಇಲ್ಲದ ಕಾರಣ ಮುಚ್ಚಲ್ಪಟ್ಟಿರುವ ನಾಲ್ಕು ಶಾಲೆಗಳು ಶಿಕ್ಷಣ ಇಲಾಖೆಯ ವ್ಯಾಪ್ತಿಗೊಳಪಟ್ಟಿದ್ದು ಇದರಲ್ಲಿ ಒಂದು ಶಾಲಾ ಕಟ್ಟಡದಲ್ಲಿ ಅಲೆಮಾರಿಗಳು ಬಂದು ವಾಸವಾಗಿದ್ದಾರೆ. ಸ್ಥಳೀಯ ಪಂಚಾಯತ್ ಅಧಿಕಾರಿಗಳ ಮೂಲಕ ಅವರನ್ನು ಸ್ಥಳಾಂತರಿಸಲು ಕೋರಲಾಗಿದ್ದು ಆಯಾ ಪಂಚಾಯತ್ ವ್ಯಾಪ್ತಿಯಲ್ಲಿ ಬರುವ ಸರ್ಕಾರಿ ಶಾಲಾ ಕಟ್ಟಡಗಳ ಸುರಕ್ಷತೆಗಾಗಿ ಕ್ರಮವಹಿಸುವಂತೆಯೂ ಕೂರಲಾಗುವುದು” ಎಂದು ತಿಳಿಸಿದ್ದಾರೆ.