ಭಟ್ಕಳ: ಇಲ್ಲಿನ ಗುಳ್ಮಿಯಲ್ಲಿ  ಗಾಂಜಾ ಮಾರಾಟಕ್ಕೆ ಸಂಬಂಧಿಸಿದಂತೆ ನಗರ ಠಾಣೆಯ ಪೊಲೀಸರು ಇಬ್ಬರನ್ನು ಬಂಧಿಸಿದ್ದು, ಇನ್ನೋರ್ವ ಪರಾರಿಯಾಗಿದ್ದಾನೆ.
ಗುಳ್ಮಿಯ ಸಲ್ಮಾನ್ ಶೇಖ್ ಅಪ್ರೋಝ್ ಹಾಗೂ ಮುಗ್ದಂ ಕಾಲೋನಿಯ ಮೊಹ್ಮದ್ ಶಾಹೀರ್ ಶಬ್ಬೀರ್ ಎನ್ನುವವರು ಬಂಧಿತ ವ್ಯಕ್ತಿಗಳಾಗಿದ್ದು ಇನ್ನೋರ್ವ ಮುಗಳಿ ಹೊಂಡದ ಅಫಾನ್ ಅಲಿ ಜಬ್ಬಾಲಿ ಎಂಬಾತ ಪರಾರಿಯಾಗಿದ್ದಾನೆ. 
ಇವರು ಗುಳ್ಮಿಯ ವ್ಯಕ್ತಿಯೊಬ್ಬರ ಮನೆ ಎದುರು ಅನಧೀಕೃತವಾಗಿ ಮಾರಾಟಕ್ಕೆಂದು ಗಾಂಜಾ ಇಟ್ಟುಕೊಂಡ ಸಂದರ್ಭದಲ್ಲಿ ಖಚಿತ ಮಾಹಿತಿಯ ಮೇರೆಗೆ ನಗರ ಠಾಣೆಯ ಪೊಲೀಸರು ದಾಳಿ ನಡೆಸಿದ್ದಾರೆ. ಬಂಧಿತ ಇಬ್ಬರು ಆರೋಪಿತರಿಂದ ೫೫ ಗ್ರಾಂ ತೂಕದ ಅಂದಾಜು ೨ ಸಾವಿರ ರೂಪಾಯಿ ಮೌಲ್ಯದ ನಾಲ್ಕು ಪ್ಯಾಕೇಟ್ ಗಾಂಜಾವನ್ನು  ವಶಪಡಿಸಿಕೊಂಡಿದ್ದಾರೆ. ಪರಾರಿಯಾದ ಅಫಾನ್‌ಗಾಗಿ ಹುಡುಕಾಟ ನಡೆಸಲಾಗುತ್ತಿದೆ. ಪ್ರಕರಣದ ಕುರಿತು ನಗರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದ್ದು ತನಿಖೆ ಮುಂದುವರಿದಿದೆ.