بنگلورو،30؍جولائی(ایس او نیوز) ریاستی وزیر برائے شہری رسد، خوراک واقلیتی بہبود ضمیر ا حمد خان نے کہا ہے کہ پڑوسی ریاست کیرلا میں اے آئی سی سی جنرل سکریٹری انچارج برائے کرناٹک کے سی وینو گوپال کے حلقے میں سیلاب کی وجہ سے جو تباہی مچی ہے اس کے متاثرین کی امداد کے لئے انہوں نے 50ہزار کلو چاول ، دس ہزار کلو شکر اور پچاس ہزار افراد کے لئے سامبر کے پاکیٹ کے علاوہ دیگر ضروری اسباب اپنے صرف خاص سے روانہ کیا ہے۔ اخباری نمائندوں سے بات چیت کرتے ہوئے انہوں نے کہاکہ یہ تمام راحت کاری اشیاء متعلقہ ضلع کے ڈپٹی کمشنر کے حوالے کی گئیں۔ انہوں نے کہاکہ وینو گوپال کے پارلیمانی حلقے الاپوزا میں سیلاب کی وجہ سے کافی تباہی مچی ہے۔ وینو گوپال نے بذات خود ان سے گزارش کی کہ متاثرین کی امداد کے لئے انتظام کیا جائے، جس پر انہوں نے کل یہ اناج اور دیگر اشیاء روانہ کی ہیں۔ انہوں نے کہا کہ وینو گوپال نے دوبارہ ان سے گزارش کی ہے کہ مزید مدد فراہم کی جائے ، جس پر انہوں نے آج مزید 50ہزار کلو چاول ، دس ہزار کلو شکر اور سامبر کے پیاکیٹ روانہ کردئے ہیں۔