یوگی حکومت اب اتر پردیش میں غیر قانونی پٹاخہ فیکٹریوں پر سخت کارروائی کرے گی
لکھنؤ، 30؍اپریل (ایس او نیوز؍آئی این ایس انڈیا )اتر پردیش کے وزیر اعلی یوگی آدتیہ ناتھ نے غازی آباد کی پٹاخہ فیکٹری میں آگ لگنے کے واقعہ کا نوٹس لیتے ہوئے سبھی ضلع مجسٹریٹ اور پولیس کپتانوں کو ہدایت دی ہے کہ وہ اپنے اپنے ضلع میں غیر قانونی پٹاخہ فیکٹریوں کی نشاندہی کرکے قصورواروں کے خلاف سخت قانونی کارروائی کریں ۔ریاستی حکومت کے ایک ترجمان کے مطابق، وزیر اعلی نے غازی آباد کے صاحب آباد میں پٹاخہ فیکٹری میں آگ لگنے کے واقعہ کو افسوسناک بتاتے ہوئے حادثے میں لوگوں کی موت پر غم کا اظہار کیا۔وزیر اعلی نے اس واقعہ کا نوٹس لیتے ہوئے سبھی ڈسٹرکٹ مجسٹریٹ اور سینئر پولیس سپرنٹنڈنٹ اور پولیس سپرنٹنڈنٹ کو ہدایت دی ہے کہ وہ اپنے اپنے ضلع میں وسیع جانچ کرکے غیر قانونی طور پر چل رہیں پٹاخہ فیکٹریوں کی نشاندہی کرتے ہوئے قصورواروں کے خلاف سخت قانونی کارروائی کریں۔ترجمان کے مطابق، یوگی آدتیہ ناتھ نے کہا کہ افسران بھی اس بات کو یقینی بنائیں کہ بغیر لائسنس کے کوئی بھی فیکٹری نہ چلائی جائیں اور جن فیکٹریوں کو لائسنس جاری کئے گئے ہیں، ان کوبھی طے شدہ معیار کے مطابق ہی چلایا جائے ۔یوگی نے حکام کو اس بات پر خصوصی توجہ دینے کی ہدایت دی ہے کہ کسی بھی حال میں آبادی والے علاقے میں نہ توپٹاخہ فیکٹریوں کا آپریشن ہو اور نہ ہی تیار پٹاخے یا پٹاخے کے بنانے میں استعمال ہونے والے دھماکہ خیز مواد کا ذخیرہ ہو۔