لکھنو،24؍اپریل(ایس او نیوز؍آئی این ایس انڈیا)اترپردیش کے وزیر اعلی یوگی آدتیہ ناتھ پیر کو پنچایتی راج دیوس کے پروگرام میں بطور مہمان خصوصی شریک ہوئے ۔یہاں انہوں نے کیش لیس سے متعلق دواپر دور کی ایک کہانی سنائی۔اس کہانی کے ذریعہ وہ لوگوں میں کیش لیس کے متعلق بیداری پیداکرنا چاہتے تھے۔انہوں نے بتایا کہ کس طرح کیش لیس کا آغاز کرشن اور سداما کے وقت سے ہی ہو گیا تھا ۔یوگی نے کیش لیس کا ذکر کرتے ہوئے کہا کہ پنچایتوں کو کیش لیس کی طرف قدم بڑھانا چاہیے۔انہوں نے سداما اور کرشن سے متعلق ایک کہانی کا ذکر کرتے ہوئے بتایا کہ کس طرح کیش لیس کا آغاز دواپر دور میں ہی ہو گیا تھا۔یوگی نے کہا کہ سداما جی جب بھگوان کرشن کے یہاں جاتے ہیں، تو کرشن انہیں کچھ نہیں دیتے۔اس پر سداما سوچتے ہیں کہ بھگوان کرشن تو راجہ بننے کے بعد مغرور ہو گئے ہیں، اس کے بعد جب وہ گھر پہنچتے ہیں، تو دیکھتے ہیں کہ ان کی امید سے کہیں زیادہ ان کو ملا ہے، وہاں تو محل بنا ہوا تھا، اس طرح کیش لئے اوردئیے بغیر کرشن نے سداما کی مدد کی تھی۔اس کے بعد یوگی نے گرام پنچایت کے ارکان کو بھیم ایپ کے استعمال کا بھی مشورہ دیا۔غورطلب ہے کہ ڈیجیٹل لین دین کو فروغ دینے کے مقصد سے وزیر اعظم نریندر مودی نے دسمبر 2016میں موبائل اپلی کیشن ’بھیم ‘لانچ کیا تھا۔مودی نے اس موقع پر کہا تھاکہ حکومت ایسی ٹیکنالوجی لا رہی ہے، جس کے ذریعہ بغیر انٹرنیٹ کے بھی آپ کا پیمنٹ ہوجائے گا۔انگوٹھا جو کبھی ان پڑھ ہونے کا نشان ہوتا تھا، وہ ڈیجیٹل ادائیگی کی طاقت بن جائے گا،آپ کا انگوٹھا ہی ڈیجیٹل ٹرانزیکشن کے لیے کافی ہوگا۔وہیں انہوں نے ڈیجیٹل ادائیگی کو فروغ دینے والے لوگوں اور کلکٹروں کوبھی اعزاز سے نوازا ۔وہیں نوٹ بند ی کے بعد مرکزی حکومت نے ڈیجیٹل ٹرانزیکشن کو فروغ دینے کے لیے لکی کسٹمر اسکیم اور ڈیجی دھن تاجراسکیم کی شروعات کی تھی۔ان میں لکی کسٹمر اسکیم صارفین کے لیے تھی، جبکہ ڈیجی دھن اسکیم دکانداروں کے لیے تھی، 10؍اپریل کو صدر پرنب مکھرجی کے ہاتھوں ان اسکیم کا لکی ڈرا نکلوایا گیا تھا، اس کے بعد امبیڈکر جینتی کے موقع پر جیتنے والوں کے نام کا اعلان کیا گیا تھا ۔، اس میں لاتور کی شردھا نے ایک کروڑ کا انعام جیت لیا تھا ۔ انہیں صرف 1590روپے کی ڈیجیٹل ادائیگی کرنے پر یہ انعام ملا تھا ۔وہ مکینکل انجینئر نگ کی طالبہ ہیں، اس کے والد کرانے کی چھوٹی سی دکان چلاتے ہیں۔