یوگیشور نے کانگریس کو خیر باد کہہ دیا ؛ ڈی کے شیوکمار پر الزامات کی بوچھاڑ، یوگیشور نے دئے بی جے پی میں شمولیت کے اشارے
بنگلورو۔14؍اکتوبر(عبدالحلیم منصور/ایس او نیوز) پارٹیاں بدلنے کی اپنی دیرینہ عادت کو دہراتے ہوئے چن پٹن کے رکن اسمبلی سی پی یوگیشور نے آج ایک بار پھر کانگریس پارٹی کو خیر باد کہہ دیا۔ پچھلے اسمبلی انتخابات میں چن پٹن حلقہ سے سماج وادی پارٹی سے منتخب ہونے والے یوگیشور کانگریس کے اقتدار پر آنے کے بعد کانگریس پارٹی کے ساتھ آگئے۔ پچھلے ساڑھے چار سال کے دوران سدرامیا وزارت میں جگہ ملنے کی تمنا میں انتظار کرتے رہے۔ اب جبکہ انتخابات قریب ہیں تو انگور کھٹے کی مانند انہوں نے کانگریس پارٹی کو برابھلا کہہ کر اس پارٹی کو خیر باد کہہ دیا اور 22؍ اکتوبر کے بعد اپنا سیاسی فیصلہ واضح کرنے کا اعلان کیا۔ آج ایک اخبار ی کانفرنس کے دوران سی پی یوگیشور نے کانگریس کی بنیادی رکنیت اور کانگریس لیجسلیچر پارٹی کی معاون رکنیت سے استعفیٰ کا اعلان کرتے ہوئے وزیر توانائی ڈی کے شیوکمار پر شدید نکتہ چینی کی اور کہاکہ ڈی کے برادران نے ان کے ساتھ کھلی ناانصافی کی ہے اور مرکزی حکومت سے بنگلور رورل کیلئے ملنے والے 180 کروڑ روپیوں کے ترقیاتی فنڈ میں انہیں کوئی حصہ نہیں دیا اور 130 کروڑ روپے محض اپنے حلقوں کیلئے استعمال کرلئے ۔ یوگیشور نے کہاکہ ڈی کے برادران کی ہراسانی سے تنگ آکر انہوں نے کانگریس کو خیر باد کرنے کا فیصلہ کیا ہے۔کانگریس اعلیٰ کمان کو انتہائی کمزور قرار دیتے ہوئے یوگیشور نے کہاکہ دولت کے بل بوتے پر ڈی کے شیوکمار اس قدر مضبوط ہوگئے ہیں کہ اس ملک کا قانون بھی اب ان کا کچھ نہیں بگاڑ سکتا۔ وہ جسے چاہیں اسے سیاسی طور پر ختم کرسکتے ہیں۔انکم ٹیکس محکمہ کے چھاپے بھی ڈی کے شیوکمار کا کچھ بگاڑ نہیں پائے۔ اس کے بعد سے ڈی کے شیوکمار نے کانگریس کے اندر اور باہر اپنے حریفوں کو ہراساں کرنے کے سلسلے میں اور شدت اختیار کرلی ہے۔ آنے والے دنوں میں بی جے پی میں شمولیت کے واضح اشارے دیتے ہوئے یوگیشور نے کہاکہ 22؍ اکتوبر کے بعد وہ اپنے سیاسی مستقبل کے بارے میں وضاحت کریں گے۔ انہوں نے کہاکہ سیاسی مستقبل کو مدنظر رکھ کر ہی وہ اپنے مستقبل کا فیصلہ کریں گے۔